Tarıftik saıasat qaıta qaraýdy qajet etedi - Qoǵamdyq keńes otyrysy
ALMATY. Sáýirdiń 22-si. QazAqparat /Názıra Eleýhan/ - Almatyda sońǵy bes jylda elektr qýaty - 2,2 esege, jylytý - 3,5 esege, ystyq sý - 5,6 esege, sýyq sý 20 esege qymbattady.
Bul týraly Almatyda ótken áleýmettik shıelenisterdi sheshý men qarastyrý jónindegi Qoǵamdyq keńestiń kezekti otyrysynda aıtyldy, dep habarlaıdy QazAqparat.
Basqosýda negizinen kommýnaldyq tarıftiń ósimin bir qalypty ustaý jáne Almaty qalasy boıynsha turǵyn-úı sharýashylyǵynyń jospary qaraldy.
«Tarıftik saıasat túbegeıli qaıta qaraýdy qajet etedi. Árıne, bul aýyr, ári qıyn úderis, biraq ol monopolıster úshin amalsyz shara. Qaıta qaraý eń aldymen tutynýshylar úshin qajet. Eń bastysy, bul júıe qoǵamǵa túsinikti jáne ashyq túrde bolýy kerek. Búginde bul júıe jabyq jáne ashyq júrgizilmeıdi», dep atap ótti otyrysta Monopolııaǵa qarsy qoǵamdyq komıssııanyń tóraǵasy Petr Svoık.
Otyrys barysynda Almaty qalasynyń Máslıhat depýtaty Andreı Morgýnov: "Keńestiń sheshimi zańdy shyǵarmashylyq jıyndardyń birinde qaralyp, talqylanatyn bolady", dep habarlady.
Almaty turǵyndarynyń bastamashyl toptyń ókili Raıhan Ámirbekovanyń aıtýynsha, qala turǵyndary segiz jyl boıy óz azamattyq quqyqtaryn qorǵap kommýnaldyq tarıfterdiń ósýimen kúresip keledi. "Bizdiń dálelderimiz ben esepterimiz QR Azamattyq-protsessýaldy kodeksindegi zańǵa negizdelgen. Osy jylǵa deıin biz monopolısterge 20-dan asa aryz jiberdik. Uzaq ýaqyt boıy sheshimin tappaı kele jatqan máseleni endi basqarýshy partııa retinde "Nur Otan" HDP-sy sheshedi degen úmittemin", dedi Raıhan Ámirbekova.
Jıynǵa qatysýshylardyń pikirlerine qaraǵanda, turǵyn-úı sharýashylyǵynyń jospary mindetti túrde keń kólemde modernızatsııalaýdy qajet etedi.
