Tarıfti ınflıatsııaǵa saı ındeksteý tutynýshylardyń qaltasyna 4 jyldan keıin áser etedi – mınıstr

ASTANA. QazAqparat – QR Energetıka mınıstri Bolat Aqsholaqov Úkimet kýlýarynda elektr tarıfin ınflıatsııaǵa saı ındeksteýdiń yqtımal saldaryna túsinik berdi, dep habarlaıdy QazAqparat tilshisi.

Úkimet otyrysynda vedomstvo elektr qýatynyń ázirligin ustap turý úshin 1 MVt qýattyń shekti tarıfin aıyna 590 myń teńgeden 2 mln teńgege deıin ulǵaıtý, keıinnen ınflıatsııa deńgeıine ındeksteý qajet degen paıym aıtqan bolatyn.

BAQ ókilderi osy saıasattyń tutynshýlar qaltasyna qalaı áser etetinin surady.

«Qazir bul naryqta 32 mlrd teńge bar. Jyl saıyn 400 mlrd teńge qosylyp otyrýy kerek. Bul - tarıf naryǵynan qaıtatyn aqsha. Biraq qaıtatyn aqshany stansa salynǵannan keıin ǵana esepteý týraly sheshim qabyldadyq. ıAǵnı, aldyn ala aqsha bermeımiz. Óıtkeni aldyn ala bergen aqsha kóbine keıin qaıtpaı qalady. Stansa salynyp, ony jaýapty oryndar qabyldap alǵannan keıin ǵana ol stantsııany ««Investıtsııa ornyna tarıf» baǵdarlamasyna qosýǵa bolady. Bul 2026-2027 jyldary jumys isteıtin shyǵar. Kim stansany qanshalyqty jyldam salatynyna baılanysty. Keıin ol tarıf baǵasyna áser etedi. 4 jyldan keıin shyǵar bálkim. Ol kezge deıin tarıfter de basqalaı bolady ǵoı», - dedi mınıstr.