Tarıfti dollardyń kýrsyna qaraı ózgertý jóninde usynys bar - Energetıka mınıstrligi

ASTANA. QazAqparat - QR Energetıka vıtse-mınıstri Baqytjan Jaqsalıevtiń aıtýynsha, búginde balamaly energııa kózderiniń baǵasyn dollardyń baǵasyna qaraı rettep otyrý máselesi kóterilip otyr. Mınıstrlik tıisti ózgeristerdi zańǵa engizýdi kózdeıdi, dep xabarlaıdy QazAqparat.

«Bizdiń usynysymyzǵa sáıkes, dollardyń baǵamyna qaraı balamaly energııa kózderiniń baǵasy kóterilip otyrady. Máselen, ótken jylmen salystyrǵanda, dollar 25 paıyzǵa qymbattasa, osy ósimniń aıyrmashylyǵyna qaraı 30 paıyz qosylady. Ázirshe, bul usynys qana. Aldaǵy ýaqytta biz balamaly energııaǵa qatysty osy bir usynysty Úkimetke, odan keıin Májiliske engizetin bolamyz», - dep atap kórsetti B.Jaqsalıev.

Degenmen, kún men jel energııasynyń baǵasy dollardyń baǵamymen rettelse de, ondaı ózgerister kúndelikti tarıfterge áser etpeýi tıis. Resmı málimetke sáıkes, búginde elimizde balamaly energııany óndiretin 50-ge jýyq nysan bar. Olardyń barlyǵy 252 MVt energııany shyǵaryp otyr. Bul jalpy elektrenergııasynyń tek 0,94 paıyzy.