Tarıfterińdi jurtqa aıtyp kóterińder — Qarjy agenttigi bankterge jańa talap qoımaqshy

ASTANA. KAZINFORM — Qarjy naryǵyn retteý jáne damytý agenttigi bankterdi tólemder men aýdarymdardyń tarıfin kóterý úshin klıentterge 3 aı buryn eskertýge mindetteıtin qaýly jobasyn Ashyq NQA portalyna shyǵardy.

Qaýlynyń tolyq ataýy — «Banktik qyzmetterdi kórsetý jáne bankterdiń, bank operatsııalarynyń jekelegen túrlerin júzege asyratyn uıymdardyń banktik qyzmetterdi kórsetý úderisinde týyndaıtyn klıentterdiń ótinishterin qaraý qaǵıdalaryn bekitý týraly» qaýly. Bul qaýlyny 2017 jyly Ulttyq bank qabyldaǵan. Agenttik osy qujatty zaman talabyna saı jetildirmekshi.

Joba mynadaı qosymsha baqylaý sharalaryn engizýdi kózdeıdi:

1) múgedektigi bar adamdarǵa jáne halyqtyń basqa da az qozǵalatyn toptaryna kórsetiletin qyzmetterdi usyný tártibin aıqyndaý;

2) bankterdi ınternet-resýrstarynda alatyn/alǵan qaryzdyń aı saıynǵy tólemderin eseptep beretin onlaın kalkýlıator ornalastyrýǵa mindetteý;

3) tólemder men aýdarymdardyń tarıfterin kótermeı turyp 3 aı buryn klıentterdi habardar etý jónindegi talap;

4) klıentterdiń ótinishterin qaraý merzimderin aıqyndaý.

Qujat 21 shildege deıin portalda talqylaýǵa qoıylyp otyr.

Buǵan deıin qazaqstandyq banktiń Tashkenttegi fılıalynan 90 myń dollar urlanǵanyn jazǵan edik.