Tarıfterge saraptama jasaıtyn Saraptamalyq keńes qurylatyn bolady - E. Dosaev
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine tabıǵı monopolııalar jáne retteletin naryqtar máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Ulttyq ekonomıka mınıstri Erbolat Dosaevtyń aıtýyna qaraǵanda, zań jobasy tabıǵı monopolııalar qyzmetiniń ashyqtyǵyn arttyrýǵa baǵyttalady. Sonymen qatar, qujatta tabıǵı monopolııalarǵa qatysty negizsiz shyǵyndardy boldyrmaý, tarıftik úderisterdi ońtaılandyrý, tutynýshylar quqyǵyn qorǵaý máseleleri qamtylyp otyr. «Tarıf qalyptastyrý jáne monopolıster qyzmetiniń ashyqtyǵyn arttyrý maqsatynda tarıfterge saraptama jasaý úshin Saraptamalyq keńes qurýdy zańdyq negizde bekitý kózdeledi. Budan bólek, energetıka salasyndaǵy domınanttarǵa buqaralyq tyńdaýlar ótkizý mindeti engiziledi, esep berýler men buqaralyq tyńdaýlar boıynsha talaptar kúsheıtiledi. Al negizsiz shyǵyndardy alyp tastaý jáne tarıftik úrdisterdi ońtaılandyrý maqsatynda tarıften qarjylyq jáne tehnıkalyq saraptama shyǵyndaryn alyp tastaý kózdelip otyr», - deıdi Erbolat Dosaev. Mınıstrdiń sózine qaraǵanda, tehnıkalyq saraptama tek qana óńirlik elektrlik kompanııalar úshin jasalady, al aýdıt aktsıonerlik qoǵam bolyp tabylatyn sýbektilerge engiziledi. Sonymen qatar, tutynýshylar quqyǵyn qorǵaý maqsatynda tabıǵı monopolııalar sýbektileri tarapynan qoldanystaǵy aktıvterdi jańǵyrtý men qalpyna keltirý jónindegi ınvestıtsııalyq baǵdarlamalarǵa qarajat baǵyttalatyn bolady. Budan bólek, monopolıster syrtqy aýa temperatýrasy boıynsha qaıta eseptelgen qarajattardy tikeleı tutynýshylarǵa qaıtarýǵa nemese olardy tarıfterdi tómendetý arqyly óteýge mindetti bolady.
«Budan basqa, depýtattar monopolııaǵa qarsy zańnamany jetildirýge baǵyttalǵan birqatar túzetýler engizdi. Atap aıtqanda, onda memleket basshylary deńgeıinde Joǵary Eýrazııalyq ekonomıkalyq keńes bekitken «Básekelestik týraly» úlgilik zańynyń normalaryn ımplementatsııalaý, naryq sýbektilerin monopolııaǵa qarsy zańnamany buzýǵa alyp keletin is-áreketterdi jasaýdan aldyn ala saqtandyrý ınstıtýtyn engizý, básekelestikke qarsy kelisilgen is-áreketterdi nemese kelisimderdi jasaǵany úshin ákimshilik jaýapkershilikten osy quqyq buzýshylyq týraly habarlaǵan tulǵany bosatý sııaqty ózgeristerdi kózdelgen», - dedi mınıstr.
