Tarıfterge baılanysty AQSh-taǵy jańa kólikter satylymy artty

ASTANA. KAZINFORM – Naýryzda jańa kólikterdiń satylymy kúrt ósti, buǵan jańa tarıfter men AQSh-taǵy dılerlik ortalyqtarǵa kólikterdiń jetkizilýiniń qysqarýy áser etti, dep habarlaıdy Kazinform menshikti tilshisi.

AQSh-taǵy dılerlik turaqtarǵa jańa kólikterdiń jalpy jetkizilimi sáýir aıynyń basynda 2,69 mln bolsa, bul naýryzdyń basyndaǵy 2,99 mln kólikten 10,2 paıyzǵa jáne bir jyl burynǵydan 2,4 paıyzǵa tómen, dep habarlaıdy Cox Automotive. 

Jańa kólikterdiń satylymy aqpan aıynyń sońymen salystyrǵanda 17,2%-ǵa jáne ótken jyldyń sáıkes kezeńimen salystyrǵanda 11,9%-ǵa ósti.

Baj salyǵyn engizý ımporttalatyn jańa kólikterdiń qunyn aıtarlyqtaı arttyrady dep kútilip otyr. Tutynýshylar jaz mezgili jaqyndaǵan saıyn kólikterdiń qymbattaýyn jáne jeńildikterdiń azaıýyn kútýi kerek. Ýaqyt óte kele óndiristiń de, satylymnyń da tómendeýin kútý kerek, bul jańa jáne eski kólikterdiń qymbattaýyna ákeledi.

HarrisX jáne Allison Worldwide júrgizgen saýalnamaǵa sáıkes, tutynýshylardyń kópshiligi kólik baǵasy kelesi jyly orta eseppen 14,4%-ǵa ósedi dep sanaıdy, dep habarlaıdy Investopedia. 

Ekonomısterdiń baǵalaýynsha, tarıfter kólik baǵasyna 2500 dollardan 10 myń dollarǵa deıin qosady.

2024 jyly ımporttalǵan jeńil jáne júk kólikteriniń jartysynan kóbi Meksıkadan nemese Kanadadan ákelingen jáne sol elderde jasalǵan kóptegen kólikterdiń shetelden kelgen bólshekteri bar.

Buǵan deıin Tramp tarıfterinen álemdegi eń baı adamdar 24 saǵatta 208 mlrd dollardan aıyrylǵanyn jazǵan bolatynbyz.