Tarıfterdi retteý jumysyn durys jasaý kerek – Úkimet basshysy

ASTANA. QazAqparat – Tarıfterdi retteý jumysyn durystap jasaý kerek. Bul týraly Premer-Mınıstr Álıhan Smaıylov aıtty, dep habarlaıdy QazAqparat tilshisi.

Búgin Úkimet otyrysynda Álıhan Smaıylov ınflıatsııany baqylaý jáne tómendetý jónindegi keshendi jospardy ózektendirý máselesi boıynsha baıandama jasaǵan Ulttyq ekonomıka mınıstri Álibek Qýantyrovtan: «Inflıatsııa qarsy jumystardyń tıimdiligi úılestirý jumysymen tikeleı baılanysty. Ulttyq ekonomıka mınıstrliginiń tarapynan qandaı úılestirý jumystar bolady jáne osy jumysty qalaı kúsheıtesizder?» dep surady.

Mınıstr bul jumysty úılestirý úshin birneshe sheshim bar ekendigin atap ótti.

«Eń aldymen ortalyq jáne jergilikti organdardyń birinshi basshylarynyń orynbasarlary deńgeıinde tıisti jumys toby qurylady. Olar jedel máselelerdi pysyqtaý, keshendi jospardy monıtorıngileý jáne tıisti sheshimder qabyldaý úshin keminde eki aptada bir ret jınalady. Premer-Mınıstrdiń orynbasary deńgeıinde aıyna bir ret bas qosady. Sodan keıin osy monıtorıng boıynsha sizdiń deńgeıińizdi toqsanyna bir ret jınalý jáne tıisti tapsyrma berý usynysyn jasap otyrmyz», - dedi Álibek Qýantyrov.

Osy oraıda Úkimet basshysy mınıstrge tarıfterdi retteý jumysyn durystap júrgizý qajettigin eskertti.

«Tarıfterdi retteý jumysyn durystap jasaý kerek. Qazir «Tarıfterdiń ornyna ınvestıtsııa» baǵdarlamasy boıynsha tarıfterdi qaıta qaraý jumysy bastalady. Sonda jańa tarıfterdiń úlesi tıisti bolýy qajet, ınflıatsııany kóterip jibermeýi kerek. Sony sizder qadaǵalap otyrýlaryńyz qajet», - dedi Premer-Mınıstr.