Tarıfterde temirjol jelisin damytýǵa qarajat qarastyrylmaǵan - QTJ

ASTANA. KAZINFORM — «Qazaqstan temir joly» ulttyq kompanııasy temirjol kóligimen júk tasymaldaý tarıfterin qaıta qarastyrý josparyna qatysty túsinik berdi.

- «QTJ» UK» AQ-nyń magıstraldyq jeli (MTJ) jáne lokomotıvtik kúshi qyzmetterine tarıfterdiń qoldanystaǵy deńgeıi aǵymdaǵy shyǵyndardy ótemeıdi jáne temirjol ınfraqurylymyn tıisinshe qoldaýǵa baǵyttalǵan ınvestıtsııalyq baǵdarlamanyń is-sharalaryn tolyq kólemde qarjylandyrmaıdy. Tarıfterde temirjol jelisin damytý úshin qarajat qarastyrylmaǵan. QR Kólik mınıstriniń buıryǵymen bekitilgen Temirjol kóligin damytýdyń 2029 jylǵa deıingi tujyrymdamasynda kózdelgen magıstraldyq jelini jańǵyrtý jáne keńeıtý jónindegi jobalardy iske asyrý úshin qarajat joq. Tarıfterdi memlekettik ýákiletti organ retteıdi. Qatań retteý kross-sýbsıdııalaýdyń kúrdeli júıesine ákeldi, - delingen kompanııanyń Kazinform agenttigine bergen jaýabynda. 

Bul turǵyda QTJ qoldanystaǵy retteletin tarıfter tıimsiz sanalatynyn, bul jaǵdaı temirjol ınfraqurylymyn damytý jónindegi jobalarǵa jeke ınvestıtsııalar tartýǵa kedergi ekenin habarlady.

- 2020-2023 jyldardaǵy memlekettik aýdıt nátıjelerine sáıkes, júkterdi tasymaldaý boıynsha qoldanystaǵy tarıf kompanııaǵa 907 mlrd teńge shyǵyn ákeldi. Qazaqstan Úkimeti «QTJ» UK» AQ retteletin tarıfteriniń deńgeıin 2024-2026 jyldar kezeńinde jyl saıyn 24 paıyzǵa kezeń-kezeńimen ulǵaıtýdy maquldady. Bul is-sharalar temirjol ınfraqurylymyn tıisti jaǵdaıda ustap turýǵa jáne jeliniń ótkizý qabiletin keńeıtýge baǵyttalǵan aýqymdy jobalardyń iske asyrylýyn eskere otyryp, kompanııanyń qarjylyq turaqtylyǵyn qamtamasyz etetin tıimdilik deńgeıine deıin tarıfterdi jetkizýge baǵyttalǵan, - dep atalyp ótken kompanııa aqparatynda.

Eske salsaq, byltyr Joǵary aýdıtorlyq palata tóraǵasy Álıhan Smaıylov «Qazaqstan temir joly» kompanııasynyń nelikten qaryzǵa batqanyn túsindirdi.