Tarıf máselesinde barlyq múdde eskerilýi kerek – Premer-Mınıstr

ASTANA. QazAqparat – Elimizde turǵyn úı-kommýnaldyq sharýashylyǵyndaǵy ınfraqurylym jaǵdaıy óte kúrdeli bolyp otyr. Bul pikirdi QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Ony jaqynda ǵana Mańǵystaý atom energetıkalyq kombınatynda bolǵan apattan da anyq baıqadyq. Apat saldarynan Mańǵystaý jáne Atyraý oblystary jaryqsyz qaldy. Eki óńirdegi iri ónerkásip oryndary aıtarlyqtaı zııan shekti, olardyń kópshiligi 2 táýlikten astam ýaqyt jumys istemeı turdy. Atyraýdaǵy munaı óńdeý zaýyty tek úshinshi táýlikte ǵana iske qosyldy», - dep atap ótti Premer-Mınıstr Úkimet otyrysynda.

Onyń aıtýynsha, ótken jylytý maýsymy da shuǵyl sheshýdi qajet etetin problemalardyń kóp ekenin kórsetti.

«Barlyq ınfraqurylym obektileriniń turaqty jumysyn qamtamasyz etý úshin aýqymdy ınvestıtsııa qajet. Sebebi, olardyń kópshiligi ótken ǵasyrdyń ortasynan beri jumys istep keledi. Sondyqtan tirshilikke qajetti júıelerdi tıimdi jańǵyrtý jáne kúrdeli jóndeý úshin «Tarıfti ınvestıtsııaǵa aıyrbastaý» qaǵıdaty usynyldy. Bul tásil energııa uıymdarynyń qoldanystaǵy aktıvterin qaıta jańǵyrtýǵa jáne keńeıtýge, energııa júıesi jumysynyń senimdiligin arttyrýǵa jáne jabdyqtardyń tozýyn azaıtýǵa múmkindik beredi», - dedi Úkimet basshysy.

Aıta keteıik, bıyl turǵyndar úshin tarıfter 10%-ten 30%-ke deıin ósedi.

«Bul – barynsha ustamdy tarıf. Onsyz kommýnaldyq ınfraqurylymnyń sapaly jumysyn qamtamasyz etý jáne ony jańǵyrtý múmkin emes. Tarıf máselesinde biz barlyq jaqtyń da múddelerin eskeretin teń ortany taba bilýimiz kerek. ıAǵnı, salany damytý qajettiligin de, halyqtyń múmkindigin de eskerýmiz kerek», - dedi Á. Smaıylov.

Buǵan deıin Ulttyq ekonomıka mınıstri Álibek Qýantyrov «Tarıfti ınvestıtsııalarǵa aıyrbastaý» baǵdarlamasy qalaı júrgiziletinin túsindirgen edi.