Tárbıeshisi balalardy urǵan balabaqshada tekserý bastaldy - Almaty
ALMATY. QazAqparat - Almatyda balabaqsha tárbıeshisiniń balalardy qulaǵynan burap, jekigeni vıdeokameralarǵa túsip qalǵan, dep habarlaıdy QazAqparat tilshisi.
Beınekadrda tárbıeshi oryndyqta aınala otyrǵan balalardyń birin qulaǵynan burap, basqa bólmege qýyp shyqqan. Az ýaqyttan soń ekinshi balany da solaı kelesi bólmege qamady.
Qalalyq bilim basqarmasynyń habarlaýynsha, bul oqıǵa №7 balabaqshada bolǵan. Qazir tekserý jumystaryn júrgizý úshin arnaıy komıssııa qurylǵan.
«Bul derek boıynsha laýazymdy tulǵalardyń bárine qatysty zańǵa sáıkes shara qabyldanatyn bolady. Kadr syrtyndaǵy daýys baqsha meńgerýshisiniń daýsy ma ol jaǵy belgisiz. Zań aldynda bári birdeı. Tekserý nátıjesi týraly keıinirek aıtatyn bolamyz», - dedi qalalyq bilim berý basqarmasynyń baspasóz hatshysy Qýandyq Eshimet .
