Tárbıeshilerdiń jalaqysy basqa pedagogterdikinen áldeqaıda tómen – vıtse-mınıstr

NUR-SULTAN. QazAqparat – Elimizde balabaqsha pedagogterin attestattaýdyń jańa júıesi eńgiziledi. Odan bólek, tárbıeshilerdiń jalaqysy artady. Bul týraly QR Oqý-aǵartý mınıstriniń birinshi orynbasary Sholpan Karınova málim etti, dep habarlaıdy QazAqparat tilshisi.

«Prezıdent bıylǵy Joldaýynda balabaqshalarda jumys isteıtin pedagogterdiń jalaqysyn kóbeıtip, júktemesin azaıtýdy tapsyrdy. Búgingi kúni balabaqshalarda jumys isteıtin tárbıeshilerdiń aılyǵy mekteptegi jáne basqa da mekemelerdegi pedagogterdiń jalaqysynan áldeqaıda tómen. Osy oraıda jalaqyny joǵarylatý boıynsha jumys jasalady», - dedi Sholpan Karınova mınıstrlikte ótken apparat jınalysynda.

Mınıstrdiń birinshi orynbasary keltirgen málimet boıynsha 2-6 jastaǵy balalardy balabaqshamen qamtý kórsetkishi - 88 paıyz.

«Sonymen qatar Prezıdent tapsyrmasynyń sheńberinde balabaqsha pedagogterin attestattaýdyń jańa júıesi eńgiziledi. Odan bólek, tárbıeshilerdiń jalaqysy artady. Halyqaralyq tájirıbege sáıkes tárbıeshilerdiń júktemesi aıtarlyqtaı azaıady. Sol sııaqty 2-6 jas aralyǵyndaǵy balalardy balabaqshamen qamtý boıynsha tıisti jumys júrgiziledi», - deıdi ol.

Eske sala ketsek, QR Prezıdenti Qasym-Jomart Toqaev bıylǵy halyqqa Joldaýynda tárbıeshilerdiń jalaqysyn kóbeıtý kerektigin júktegen edi.

Sondaı-aq, mınıstrliktiń apparat jınalysynda Ashat Aımaǵambetov Joldaýda kóterilgen bilim máseleleri boıynsha jumys tobynyń qurylǵanyn málimdedi.