Tárbıeshilerdiń aılyǵy da, olarǵa qoıylatyn talap ta artady - Ashat Aımaǵambetov

NUR-SULTAN. QazAqparat – Tárbıeshilerdiń aılyǵyn kóterý máselesi olarǵaqoıylatyn talappen birge artady. Parlament kýlýarynda Prezıdent joldaýynyń bilim salasyna qatysty tapsyrmalary týraly pikir bildirgen QR Oqý-aǵartý mınıstri Ashat Aımaǵambetov osyndaı paıym aıtty, dep habarlaıdy QazAqparat tilshisi.

«Bilim salasy Memleket basshysynyń únemi basty nazarynda. Ony jańa ózderińiz kórdińizder. Óte kóp bastama aıtylyp, bizge birqatar tapsyrma berildi. Osy tapsyrmalardyń sheńberinde jumys isteımiz. 1-2 kúnnen keıin naqty qandaı sharalar qabyldanatyny jóninde resmı aqparat beremiz», - deıdi vedomstvo basshysy.

Sondaı-aq, ol balabaqsha tárbıeshileriniń aılyǵyn kótere túsý ýaqyt talabynan týyndap otyrǵan másele ekenin atady.

«Memleket basshysy ustaz mártebesi, olardyń jalaqysy týraly árdaıym aıtyp keledi. Jalpy kelesi jyly qańtardan bastap muǵalimderdiń aılyǵy 25 paıyzǵa kóteriledi degen tapsyrmasy bar. Oǵan búgin Memleket basshysy tárbıeshilerdiń eńbekaqysyn kóterip, júktemesin azaıtý qajettigin aıtty. Bul – keremet nárse. Óıtkeni olardyń da jalaqysy kóterilip jatqanymen, ustazdarǵa qaraǵanda az bolǵandyqtan áli de kótere túsýdi qajet etedi. Pedagogterdi attestattaý jáne akkredıtteý boıynsha jumysty bastap kettik te. Endi mektepke deıingi bilim berý uıymdarynda da osyndaı jumys júrgizý týraly tapsyrma berilgenin kórdińizder. Bul shyn máninde halyqaralyq tájirıbede bar», -dediAshat Aımaǵambetov.

Mınıstr jalpy tárbıeshilerdi attestattaý, muǵalimderdi akrredıtteý jáne sertıfıkattaý, «Qolaıly mektep» jobasy týraly Prezıdent tapsyrmalary boıynsha mindetti túrde júıeli jumys júrgiziletinin málim etti.

Eske salsaq, Prezıdent Qazaqstan halqyna Joldaýynda 2025 jyly úsh aýysymdy jáne apatty jaǵdaıdaǵy mektepter problemasy tolyq sheshiletinin aıtqan edi.