Tárbıeshiler balalardy uryp-soqpas úshin jergilikti organdar baqylaýdy kúsheıtýi tıis - mınıstr
ASTANA. QazAqparat – Búgin QR Oqý-aǵartý mınıstrliginiń alqa otyrysynda mınıstr Ǵanı Beısembaev balabaqsha tárbıeshileriniń balalarǵa qol jumsaýy jaıynda sóz qozǵady, dep habarlaıdy QazAqparat tilshisi.
«Ótken jyly 39 myńǵa jýyq orynǵa arnalǵan 458 balabaqsha iske qosyldy. Jekemenshik balabaqshalardyń 93%-na memlekettik tapsyrys berildi. Nátıjesinde 2-6 jasar balalardy tárbıe-bilimmen qamtý 89,4%, al 3-6 jastaǵylardy - 99,4% artty. Byltyr balalardyń daǵdylaryn, zertteý qyzmetin damytý jáne damytýshy orta qurý úshin oqý jáne oıyn materıaldarynyń tizbesi bekitildi. ıAǵnı, mektepke deıingi bilim berý uıymdaryn jaraqtandyrý normalary jasaldy», - dedi Ǵanı Beısembaev vedomstvonyń keńeıtilgen alqa otyrysynda.
«Ókinishke qaraı, byltyr tárbıeshiler tarapynan balalarǵa kúsh kórsetý faktileri boldy. Aldaǵy ýaqytta ondaıdy boldyrmaý úshin jergilikti atqarýshy organdar baqylaýdy kúsheıtýi qajet», - deıdi mınıstr.
Buǵan deıin habarlaǵanymyzdaı, ótken jyly mektep-balabaqshalardyń 77 paıyzy alǵashqy memlekettik attestatsııadan súringen.
