Tárbıeshi mamandyǵyndaǵy 9 myń túlektiń 10 paıyzy ǵana balabaqshada jumys isteıdi
ASTANA. QazAqparat - Elimizde jyl saıyn tárbıeshi mamandyǵyn alyp shyǵatyn 9 myń túlektiń 10 paıyzy ǵana balabaqshaǵa jumysqa ornalasady. Bul týraly búgin QR Parlamenti Senatynyń depýtattarymen kezdesken Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.
«Elbasy qazan aıyndaǵy Joldaýynda mektepke deıingi bilim sapasyn kóterý tapsyrmasyn qoıdy. Osy jumysty tek qana tárbıeshilerdiń mártebesi men sapasyn kóterý arqyly ǵana oryndaýǵa bolady. Búgingi tańda balabaqshalarda 55 myń tárbıeshi jumys isteıdi», - dedi ol.
Onyń dereginshe, elimizde tárbıeshi mamandyǵyna 36 kolledj ben 37 joǵary oqý orny daıyndaıdy. Jyl saıyn osy mamandyq boıynsha grant sany da arta túsýde. Máselen, 2017 jyly elimizdiń joǵary oqý oryndarynda tárbıeshi mamandyǵyna 278, al 2018 jyly 500 grant bólgen. Kolledjderde de dál osyndaı úrdis baıqalady. Bir jylda tárbıeshi mamandyǵyna bólingen granttar sany 1640 birlikke artqan.
«Osyǵan qaramastan jyl saıyn 9 myń bitirýshiniń 900-i ǵana balabaqshaǵa jumysqa ornalasady. Bul óte az. Endi tárbıeshilerdiń aılyqtaryn kóterip, jańa biryńǵaı testileý júıesin engizip, biliktiligin arttyrý qajet bolyp tur. Bilimdi mamandar ary qaraı balabaqshaǵa barmaı magıstratýraǵa túsedi, basqa mamandyqqa aýysady nemese jalaqysy joǵary jumysqa ornalasady. Onyń barlyǵyn bilemiz, túsinemiz. Sondyqtan bul máseleni sheshý kerek bolyp tur», - dedi Erlan Saǵadıev.
