Tárbıeshi mamandyǵyna buryn bir orynǵa 10 adamnan astam úmitker bolsa, qazir 1-ge de jetpeıdi - Aımaǵambetov

NUR-SULTAN. QazAqparat – Balabaqsha tárbıeshisi mamandyǵyna qyzǵýshylyq óte tómen. Bul jaıtty Prezıdent Joldaýynda bilim berýdi odan ári damytý jáne pedagogterdi qoldaý máselelerine erekshe nazar aýdarylǵany týraly áleýmettik jelide jazǵan oqý-aǵartý mınıstri Ashat Aımaǵambetov atap ótti.

«Keıingi 3 jylda balabaqsha tárbıeshileriniń jalaqysy eki esege deıin óskenimen, onyń bilikti kadrlardy tartýǵa áli de jetkiliksiz ekeni baıqalyp otyr. Osydan birneshe jyl buryn JOO-daǵy bir orynǵa 10 adamnan astam úmitker bolsa, qazir 1-ge de jetpeıdi. Osyǵan baılanysty Memleket basshysy balabaqsha tárbıeshileriniń jalaqysyn kóbeıtip, júktemesin azaıtýdy tapsyrdy. Balalardy balabaqshamen qamtý boıynsha qosymsha sharalar qabyldanady», - dep jazady mınıstr.

Mınıstr Memleket basshysynyń úsh aýysymda oqıtyn jáne qırap turǵan mektepterdiń máselelerin sheshý úshin «Jaıly mektep» jańa ulttyq jobasyn qabyldaýdy tapsyrǵanyna da toqtalǵan.

«2021 jyly 250-den astam mektep paıdalanýǵa berilgen bolatyn. Bıyl taǵy 230-dan astam mektep ashý josparlanǵan. Osyǵan qaramastan, másele áli ótkir kúıinde qalyp otyr. Ulttyq joba aıasynda 2025 jylǵa qaraı keminde 840 myń oqýshy ornyn qurý josparda bar. Sonymen qatar, jańa mektepter zamanaýı qural-jabdyqtarmen, qajetti synyptar sanymen jáne sport zaldarymen jabdyqtalýy kerek. Bastaýysh jáne joǵary synyptardy jeke ashanalary, jýynatyn bólmeleri, sport zaldary bar bólek bloktarda oqytý usynylyp otyr», - deıdi Ashat Aımaǵambetov.

Eske salsaq, 1 qyrkúıekte Memleket basshysy Qasym-Jomart Toqaev Parlament palatalarynyń birlesken otyrysynda jetinshi saılanǵan Parlamenttiń úshinshi sessııasyn ashyp, halyqqa Joldaýyn jarııalady.