Tárbıeleýshi kolonııalardaǵy zań buzýshylyq faktileri boıynsha tıisti sharalar qabyldandy

Bul týraly búgin Astanada ótken QR Úkimeti janyndaǵy Kámelet jasqa tolmaǵandardyń isteri jónindegi vedomstvoaralyq komıssııanyń kezekten tys 7-shi májilisinde Ádilet mınıstrliginiń Qylmystyq atqarý komıteti tóraǵasynyń orynbasary Talǵat Ahmetov aıtty.

Onyń sózine qaraǵanda, tárbıeleýshi kolonııalardyń qyzmetinde júrgizilip jatqan jaqsy jumystarmen qosa, jasóspirimderdiń múliktik jáne eńbek quqyqtaryn saqtaýda kemshilikter men pysyqtalatyn sharýalar bar. Bul Bas prokýratýranyń aǵymdaǵy jylǵy qańtardyń 15-gi usynysynda kórinis tapqan. Al, komıtet olardy joıý jáne keleshekte jol bermeý úshin tıisti sharalar qabyldaǵan jáne ol Bas prokýratýraǵa der kezinde habarlanǵan. «Máselen, Aqtóbe oblysynda kámelet jasqa tolmaǵandarǵa alımentterdi, zeınetaqyny jáne basqa da tólemderdi aýdarý úshin ókiletti organdardyń quqyq ornatatyn qujattardy der kezinde rásimdemegeni anyqtalǵan. Osyndaı 5 kámelet jasqa tolmaǵandar belgili boldy. Qazirgi ýaqytta biz tıisti jumystardy júrgizdik, sóıtip atalmysh tólemder der kezinde tólendi jáne kórsetilgen tulǵalardyń atyna rásimdeldi. Osyǵan uqsas jumys Shyǵys Qazaqstan oblysynyń mekemelerinde de júrgizildi. Ol jerde de kámelet jasqa tolmaǵan 5 bala ózderine tıeseli járdemaqyny almaǵan. Olar boıynsha da tıisti jumystar júrgizildi. Olar qazir járdemaqylaryn alýda», dedi ol.

T. Ahmetov elimizdiń basqa da aımaqtaryndaǵy kámelet jasqa tolmaǵandardy tárbıeleýshi kolonııalardyń qyzmetin jaqsartýda atqarylyp jatqan sharýalarǵa toqtalyp ótti.

Onyń aıtýynsha, Qazaqstanda qazirgi tańda kámelet jasqa tolmaǵandar tárbıelenetin 4 kolonııa bar. Olar Aqtóbe, Shyǵys Qazaqstan, Soltústik Qazaqstan jáne Almaty qalasynyń aýmaqtarynda ornalasqan. Sonymen qatar, Almatydaǵy áıelder mekemesi janynda kámelet jasqa tolmaǵan qyzdarǵa arnalǵan tárbıeleýshi kolonııa bar.