Tarbaǵataılyq «Babalar sazy» etno-toby Iranda óner kórsetedi
«Oblystyq Mádenıet, muraǵattar jáne qujattama basqarmasy arqyly barlyq jerge halyqaralyq baıqaýlardyń erejeleri keledi. Biz sol kelgen ereje boıynsha daıyndalyp, ınternet arqyly aýdıo jáne vıdeo materıaldarymyzdy jiberdik. Sodan keıin erejege saı bolǵan ansamblder ártúrli festıvalderge qatysady. Biz de sol shartqa saı kelgendikten, Iran Respýblıkasyna jolymyz túsip otyr», - deıdi Sháken Kópshikbaeva.
«Babalar sazy» etno-toby Tarbaǵataı aýdany Aqsýat mádenıet úıinde 2014 jyly qurylǵan. Ansambldi qurýshylar qazaqtyń umytylyp bara jatqan ulttyq kóne aspaptaryn qaıta jańǵyrtýdy maqsat tutqan. 2015 jyly ansambl Qazaq handyǵynyń 550 jyldyǵyna arnalǵan respýblıkalyq etnofolklorshylar baıqaýyna qatysyp, óziniń qaıtalanbas mánerimen kóptiń qurmetine ıe bolǵan. Ansambl ónerpazdary shertpeli aspaptarda, jetigen, sherter, úsh ishekti dombyrada, shińkildek, soqpaly aspaptarda, daýylpaz, asataıaq, shańqobyz, sazsyrnaıda oınaıdy.
«Bizge Iran Islam Respýblıkasynyń Qazaqstandaǵy Elshisiniń qoly qoıylǵan shaqyrtý keldi. Aýdan ákimi (Tarbaǵataı aýdany ákimi Dildábek Orazbaev - avt.) zor qoldaý kórsetip otyr. Qazaqstan aýmaǵyndaǵy shyǵyndardy ózimiz japsaq, Tegerandaǵy shyǵyndy Iran tarapy kóteretin boldy. Tegeranda birneshe kontsert beremiz», - deıdi ansambl jetekshisi.
Ansambl quramynda alty adam bar. Atap aıtqanda, etno-toptyń kórkemdik jetekshisi Qanat Ábýǵazın Qurmanǵazy atyndaǵy konservatorııada jyl saıyn sheberligin shyńdap keledi eken. Al Elaman Qujymanov - ansambldiń ánshisi. Ekinshiden, ol dombyrada, asataıaqta, shańqobyzda oınaıdy. Top ónerpazdarynyń árqaısysy birneshe aspapty meńgergen. Ǵalymbek Ahmetov qus saıraýyq, sazsyrnaı, dańǵarada, shańqobyzda oınap, án shyrqasa, Aıjan Tileýlenova jetekshi dombyrashy retinde kúıshiligimen kópti tańǵaldyryp keledi. Sandýǵash Orynbekova jetigenniń, Lázzat Naımanǵazyqyzy qylqobyzdyń sheberi.
«Irandyqtarǵa arnap arnaıy repertýarymyzdy daıyndadyq. Naqtyraq aıtqanda, Qaztýǵan jyraýdyń «Alań da alań, alań jurt» tolǵaýyn Elaman Qujymanov oryndaıdy. Odan keıin Almas Aqatulynyń «Dombyra» degen shyǵarmasy bar. Ony da Elaman pash etetin bolady. Nurǵısa Tilendıevtiń «Aqqý», Dáýletkereıdiń «Kóruǵly» kúıleri men Altaı-Tarbaǵataı mektebine tán «Halyq kúıi» atanyp ketken «Bulǵyn-sýsardy» oryndaımyz. «Tarbaǵataı - Táńirtaý» degen shyǵarmasy da kóptiń kóńilinen shyǵar degen senimdemiz», - deıdi Sháken Kópshikbaeva.
Aıta ketsek, «Babalar sazy» etno-toby 2015 jyly Qazaq handyǵynyń 550 jyldyǵyna oraı, «Uly Dala qyrandary» respýblıkalyq qozǵalysynyń fılarmonııalyq óner ujymdary ishinde Astanada bas júlde alǵan. 2017 jyly Shyǵys Qazaqstandaǵy Glýbokoe aýdanynda «Ǵasyrlar pernesi» atty festıvalde de top jarǵan bolatyn.
