«Tarbaǵataıǵa tasqynnyń ekinshi tolqyny jetti» - respýblıkalyq basylymdarǵa sholý
ASTANA. Sáýirdiń 20-sy. /QazAqparat/ Qazaq aqparat agenttigi respýblıkalyq basylymdarda sáýirdiń 20-sy, seısenbi kúni shyqqan ózekti materıaldarǵa sholýdy usynady.
«Alash aınasy» gazetiniń búgingi sanynan qazaqstannyń tuńǵysh kólik mınıstri Nyǵmetjan Esenǵarınmen bolǵan suhbatty oqı alasyzdar. Onda redaktsııa qonaǵy temirjol salasynda qazaq tilin qoldaný máselesi, Qytaı-Qazaqstan temirjol qatynasynyń ótken tarıhy, jeke ómiri týraly keń kólemde áńgime órbitedi. «Meni tepse temir úzetin jastardyń óndiriske emes, kúzet qyzmetine jumysqa baratyny tańǵaldyrady» degen taqyryppen berilgen bul suhbattyń avtory -jýrnalıst Halıma Buqarqyzy.
Tarbaǵataıǵa tasqynnyń ekinshi legi keledi. Boǵas ózeni arnasynan asyp, mańaıdaǵy eldi mekenderdi taǵy da dúrliktirdi. Tasqyn Qyzylkesiktiń joǵarǵy bóligindegi aınalmaly joldan salynǵan jańa kópirdiń shetin shaıyp ketken. Bul týraly tolyǵyraq «Alash aınasy» gazetiniń tórtinshi betinde jarııalanǵan «Tarbaǵataıǵa tasqynnyń ekinshi tolqyny jetti» atty maqaladan oqı alasyzdar.
Bıyl qazaqstandyq jaǵajaı voleıboly sheberleri erlep tur. Taılandta Azııa týry dodasynyń úsh kezeńdik týrnıri ótip, bizdiń sportshylar táp-táýir nátıjeler kórsetti. Qazaq sportshylarynyń ózge eldegi jetistikteri týraly bilgińiz kelse, gazettiń «Doda» aıdaryndaǵy «Taılandtaǵy ár týrdan-bir júlde» taqyrybymen berilgen maqalaǵa nazar aýdaryńyz.
***
Elbasy Nursultan Nazarbaevtyń bıylǵy Qazaqstan halqyna arnaǵan Joldaýynda erekshe mán bergen jańa halyqaralyq ýnıversıtet týraly bilgisi keletin oqyrmandar úshin, « Egemen Qazaqstan» basylymynyń búgingi sany «Zaman suranysyna saı oqý orny» degen taqyryppen "Astananyń jańa ýnıversıteti" AQ prezıdenti Aslan Sarınjıpovpen bolǵan suhbatyn jarııalapty.
Qazaq topyraǵyna da bomba túsken. Oıylǵan jerdiń jarasy áli sol qalpy jatyr. Ol -tarıhı óńir Bókeı ordasy. Bul týraly« Egemen Qazaqstan» gazeti buryn da jazǵan bolatyn. Endi sony jeńis qarsańynda qolǵa túsken jańa derektermen qaıta jańǵartýdy jón kóripti. Buǵan jol ashyp, soǵys zardabyn, el-jer tarıhyn tereńdep bilýge erekshe septigin tıgizgen Bókeı ordasy aýdanynyń ákimi, ult, el men jer tarıhyn zerdelep júrgen Rahman Qarın eken. Gazettiń búgingi sanynda jaryq kórgen «Bókeı ordasy Stalıngrad maıdanynyń tyly bolǵan» atty maqala osydan 70 jylǵa taıaý ýaqyt burynǵy taǵdyrly oqıǵalardy Rahman Orazulyn qatystyra otyryp, oqyrmanǵa jetkizipti.
«Tasqynnan bergi bir aı ishinde mundaǵy tirlikke syrt kózben baǵa bersek, aýyldaǵy apattan keıin tazartý jumysy aıaqtalyp, qalypty ómir ornyǵa bastaǵan. Qurylys qarqyn alǵan. Salystyrmaly túrde aıtsaq, "Almaty qala qurylysy" mekemesi qurylysshylarynyń qımyldary shıraq. Kireberistegi jańa kóshede 25 úı sap túzep, ishi-syrtyndaǵy sapaly atqarylǵan jumysqa kóńil toldy. Jańa úıde jańasha ómir bastalatynyna degen turǵyndar senimi de ornyqqan. Osy úı meniki degender aınalshyqtap júr. Al, ózge de qurylysy bastalǵan úılerdiń biriniń shatyry jabylsa, ekinshisiniń irgetasy qalanyp, qabyrǵasy kóterilýde»,-dep jazǵan« Egemen Qazaqstan» gazetindegi kelesi maqala «Qyzylaǵashtyń qazirgi hali qandaı?» degen taqyryppen berilipti.
***
Qyrǵyzstan Respýblıkasynyń ýaqytsha úkimetiniń basshysy Roza Otýnbaeva Qazaqstannan gýmanıtarlyq kómek surap otyr. Keshe Qazaqstan Prezıdenti Nursultan Nazarbaev Úkimet basshysyna osy másele boıynsha kelissózder júrgizýdi tapsyrdy. Bul týraly tolyǵyraq «Aıqyn» basylymynyń búgingi sanynda jaryq kórgen «Qyrǵyzstan kómek surady» atty maqaladan oqı alasyzdar.
«Ómirimde óner men tártip qýdym, Qyzǵa qumar ákeme tartyp týdym». Osy taqyryppen berilgen «Aıqyn» gezetindegi kelesi maqala búgingi oqýshylar tyńdap júrgen mán-maǵynasyz ánderdi synǵa alypty. «Bir sózben aıtqanda, bilim salasyndaǵylar mektepterdegi mýzyka sabaǵyna degen kózqarasyn ózgertip, kitaptardyń mazmunyn jańartyp otyrsa degen oı keledi. Oǵan qosa, balalar ánderine memlekettik deńgeıde nasıhat qajet sııaqty... Sonda múmkin mektep jasyndaǵylar jasyna saı án tyńdaıdy. Bul barlyq ata-ananyń, qala berdi, qoǵamnyń janaıqaıy bolýy tıis!»,-dep jazady basylym.
«Keden odaǵyna qatysy bar elderde biryńǵaı saýda saıasaty qalyptasady»,- deıdi Aýyl sharýashylyǵy mınıstri Aqylbek Kúrishbaev «Aıqyn» gazetine bergen suhbatynda. Aýyl sharýashylyǵy salasyndaǵy túıtkilikti máseleler tóńireginde mınıstrmen oı bóliskińiz kelse, atalǵan gazettiń «Aq sóıle!» aıdaryna nazar salyńyz.
***
Sáýir aıy - qurylys alańyndaǵy jumystyń qyza bastaıtyn kezi. Osyndaı ýaqytta qurylystardy aralap, jumysshylar men olardyń basshylaryna eńbek qaýipsizdigin saqtaý jónindegi túsindirme jumystaryn uıymdastyrý - Astana qalasy boıynsha Baqylaý jáne áleýmettik qorǵaý departamentiniń qalyptasqan dástúri. Bıyl da bul úrdis úzilmeı jalǵasyp, keshe tıisti mamandar qurylys nysandaryn aralap, arnaıy aktsııa ótkizdi.«Astana aqshamy» basylymynyń búgingi sanynda jaryq kórgen «Eńbek qaýipsizdigi - eń basty qaǵıdat» atty maqala osy sharaǵa toqtalypty.
«Astana aqshamy» gazetiniń búgingi sanyndaǵy kelesi maqala «Besiginen bezingen ulttyń bolashaǵy bulyńǵyr» degen atpen berilipti. Aty aıtyp turǵandaı maqala qasıetti tal besigimizdiń búgingi taǵdyryna nazar aýdarypty. «Al jat jurttyń aram pıǵylyna erip, qazaqtyń tal besiginen bezingenderdiń jaıy túsinikti: besik bizdiki emes, batystan shyǵyp, búgin bizge jańalyq bolyp jetken nárse bolsa ondaılar mindetti túrde japa tarmaǵaı búgin besikke júgirgen bolar edi»,-deıdi basylym.
***
