Tarbaǵataıdaǵy órt toqtatylyp, oshaqtary sóndirilip jatyr
ASTANA. KAZINFORM — Abaı oblysyndaǵy Tarbaǵataı memlekettik ulttyq tabıǵı parkiniń aýmaǵyna ótken dala órtiniń taralýy toqtatyldy. Qazir órttiń byqsyp jatqan oshaqtaryn sóndirý jumystary jalǵasyp jatyr, oǵan 284 adam men 26 tehnıka jumyldyrylǵan. Bul týraly Ekologııa mınıstrligi málim etti.
Mınıstrliktiń málimetinshe, 20 qyrkúıekte Aıagóz aýyldyq okrýginde tirkelgen dala órti sol kúni saǵat 18:30-da Tarbaǵataı memlekettik ulttyq tabıǵı parkiniń Qarabuırat ormanshylyǵy aýmaǵyndaǵy memlekettik orman qory jerlerine ótken.
22 qyrkúıek saǵat 04:30-da órttiń odan ári taralýy toqtatyldy. Órt jıegi turaqty. Qazirgi ýaqytta byqsyp jatqan oshaqtardy sóndirý jumystary áli de jalǵasyp jatyr.
Vedomstvonyń dereginshe, saǵat 12:00-degi jaǵdaı boıynsha órt sóndirýge orman kúzeti, «Semeı ormany» MOTR, Abaı oblysynyń TJD jáne jergilikti atqarýshy organdarynan 284 adam men 26 tehnıka jumyldyrylǵan.
— Áýeden órt sóndirýge «Qazavıaormanqorǵaý» RMQK jáne Ulttyq qaýipsizdik komıtetiniń sý tógý qurylǵylarymen jabdyqtalǵan eki Mı-8 tikushaǵy tartyldy. Órt sóndirý bastalǵaly 22 ret sý tógilip, jalpy 59 tonna sý paıdalanyldy, — delingen habarlamada.
Jumystar taýly jer bederi men órt sóndirý tehnıkasy jete almaıtyn ýchaskelerdiń bolýyna baılanysty kúrdelenýde. Órt negizinen memlekettik orman qorynyń ormansyz aýmaqtaryn qamtydy.
Qarabuırat aýylynda jedel shtab quryldy. Jumystardy úılestirý úshin oqıǵa ornynda QR ETRM Orman sharýashylyǵy jáne janýarlar dúnıesi komıteti tóraǵasynyń orynbasary M. Elemesov jumys istep jatyr.
Aıta keteıik, buǵan deıin órtti sóndirý jumystary 4 m/s-qa deıingi qatty jelge, taýly jer bederine jáne órt sóndirý tehnıkasy jete almaıtyn jekelegen ýchaskelerdiń qoljetimsizdigine baılanysty qıyndap otyrǵanyn jazǵan edik.
