Tarbaǵataıda «Altyn adam» qorymy qazylyp jatyr
ÓSKEMEN. QazAqparat - Shyǵys Qazaqstannyń Tarbaǵataı aýdanynda «Altyn adam» qorymy qazylyp jatyr, dep habarlaıdy QazAqparat tilshisi.
ShQO ákiminiń baspasóz qyzmeti taratqan aqparatqa sensek, Tarbaǵataı taýlarynyń qoınaýyndaǵy Eleke sazy dep atalatyn kórikti jaılaýdan bizdiń zamanymyzǵa deıingi 8-7 ǵasyrlarǵa jatatyn saq aqsúıekteriniń qorymy tabylǵan. Qorymnyń qulpyn ashyp, qupııasyn zerttep júrgen - arheolog Zeınolla Samashev.
Arheologııany damytýdyń óńirlik baǵdarlamasy aıasynda qolǵa alynǵan qazba jumystarynyń nátıjesimen ShQO ákimi Danıal Ahmetov baryp tanysty.
2016 jyly ǵana arhelogtardyń nazaryna ilingen bul aýmaqta 300-den astam kóne beıit pen qorym bar. Ol týraly alǵash arhelogtarǵa jergilikti shopandar aıtqan eken. Zeınolla Samashev pen Ábdesh Tóleýbekov bastaǵan arheologtar búginge deıin júzdegen qorymnyń eń úlken degen ekeýin qazyp zerttep úlgergen.
Zeınolla Samashevtiń aıtýynsha, tabylǵan altyn buıymdar saq bekzadalary men hanzadalaryna tıesili bolǵan. Ásirese áıel zatyna qajet áshekeıli japsyrmalar men qapsyrmalar, at abzeliniń atrıbýttary kóp tabylǵan.
«Bul aýmaqta 7 úlken qorym, 300-den astam beıit bar. Biz qazyp jatqan qorymnyń syrtynda 50 metr qashyqtyqta taspen sheńber órilgen. Bul - «Altyn adam» degen uǵymǵa sáıkes keletin qorymdardyń biri. Qorymnyń qurylymy úsh bólikten turady. Eń astyńǵy qabaty tastan qalanyp, onyń syrty topyraqpen qaptalyp, betinen taǵy tas qalanǵan. Syrtqy pishini men qurylymyna qarap, bul qorymdy Shilikti qorymymen, Jetisýdaǵy Besshatyr, Tyvadaǵy Arjan, Hakasııadaǵy Salbyq qorymdarymen salystyrýǵa bolady. Erte saq dáýirine keledi» - deıdi Zeınolla Samashev.
Foto: voxpopuli.kz
