«Tarbaǵataı» ımandylyq-qaıyrymdylyq qory jurtshylyqty Shyǵystaǵy sý basqan óńirge qol ushyn berýge shaqyrady
ALMATY. Sáýirdiń 9-i. QazAqparat / Ádilet Musahaev / - «Tarbaǵataı» ımandylyq-qaıyrymdylyq qory jurtshylyqty Shyǵys Qazaqstan oblysy Tarbaǵataı aýdanyndaǵy tabıǵat apatynan zardap shekken jandarǵa kómek kórsetýge shaqyrady,
dep habarlaıdy QazAqparat.
«Qazaqstannyń kez kelgen túkpirinde bolǵan apat pen qıynshylyq bárimizge ortaq. Almaty oblysynyń Qyzylaǵash, Egindisý aýyldarynda bolǵan qasiret qaıtalanbas úshin Shyǵystaǵy sý basqan óńirge jedel járdem qajet. Qıynshylyqqa dýshar bolǵandarǵa ár adam qoldan kelgen kómegin kórsetedi dep senemiz. Eldigimiz ben azamattyǵymyzǵa syn bolar sátte syrt qalmaı, qol ushymyzdy bereıik», deıdi «Tarbaǵataı» ımandylyq-qaıyrymdylyq qorynyń atqarýshy dırektory Aıan qajy Oqasov.
Atalmysh qor 2005 jyly Almatyda qurylyp, ıgilikti isterimen tanylyp keledi.
«Sonaý qıyn -qystaý kezeńde aýdanymyzdaǵy múmkindigi bar adamdar qala jaǵalap, qonys aýdaryp ketti. Qalaǵa kelip, jaǵdaıy túzelgen halyq artta qalǵan jurtty umytpaıyq, olarǵa qolymyzdan kelgenshe áleýmettik jaǵynan kómektesip turaıyq degen maqsatta osy qordy qurǵan bolatynbyz. Osy qorǵa túsken qarajatty aýyl jaqqa jiberip, ondaǵy ósip kele jatqan jastarǵa ımandylyq jaǵynan kómek kórsetip, meshitter ashý jumystaryn qolǵa alyp otyrmyz», deıdi atqarýshy dırektor.
Sondaı-aq ol, tek sol óńirge ǵana emes, jalpy Qazaqstan boıynsha jumys istesek degen nıetin aıtady. Óıtkeni qor 2008 jyly Beıjiń olımpıadasynyń jeńimpazdaryn «Dınamo» sporttyq birlestikpen birigip elimizge ataq ákelgen azamattardy dáripteý jumysyn júrgizip, ulyqtaý saltanatyna atsalysqan.
Sonymen qatar Tarbaǵataı óńirinde eki meshit ashyp, Aqjar aýylyndaǵy balabaqshaǵa avtokólik syılap, taǵy basqa osyndaı ıgi isterge muryndyq bolyp kele jatyr.
