Tarbaǵataı halqy Qabanbaı batyrdyń 330 jyldyǵyn atap ótip jatyr

ÓSKEMEN. QazAqparat – Shyǵys Qazaqstan oblysy Tarbaǵataı aýdanynda Qabanbaı batyrdyń 330 jyldyǵy atalyp ótip jatyr, dep habarlaıdy QazAqparat tilshisi.

Tarbaǵataı aýdanynyń ortalyǵy Aqjar aýylynda Qarakereı Qabanbaıdyń 330 jyldyq mereıtoıy «Babalar erligi – ultqa mura, urpaqqa úlgi» atty ǵylymı-teorııalyq konferentsııadan bastaldy.

Batyrdyń erligin ulyqtaý sharasyna Qazaqstan jazýshylar odaǵynyń tóraǵasy Ulyqbek Esdáýlet, «Ketbuǵa-Tólegetaı» halyqaralyq qorynyń úılestirýshisi Manarbek Muhamedjanov, fılosofııa ǵylymdarynyń doktory Nurdáýlet Aqysh, áskerı tarıhshy Qaırat Saǵataıuly, aqyn, fılologııa ǵylymdarynyń doktory Janat Áskerbek, Tarbaǵataı aýdanynyń ákimi Darhan Jórgekbaev jáne basqa da tarıhshy, ǵalymdar qatysyp, daraboz Qabanbaı batyrdyń jaýgershilik zamandaǵy qaharmandyǵyn, qolbasshylyǵyn baıan etti.

«Qarakereı Qabanbaı qatyspaǵan birde-bir iri shaıqas bolmaǵan. Qabanbaı batyr jekpe-jekke 103 ret shyǵyp, barlyǵynda jeńiske jetken. Qazaq batyrlaryna bas, erlik isterge uıytqy bolǵan uly qolbasshy óz kezeńinde atty ásker soǵysynyń myqty strategi, jekpe-jektiń tendesi joq sheberi edi», - deıdi áskerı tarıhshy Qaırat Saǵataıuly.

Qarakereı Qabanbaı qazaq jerin jaýdan azat etýde alpys jyl at ústinen túspeı, jońǵar shapqynshylyǵy kezinde eren erliktiń úlgisin kórsetken.

Mereıtoı alaman báıge, at shabys, sporttyq jarystar men kontserttik baǵdarlamalarmen jalǵaspaq. Batyr árýaǵyna arnap as ta beriledi.