Tarazysy talapqa saı emes dúken ıesine 5 mln teńgege jýyq aıyppul salyndy

ASTANA. QazAqparat - Tehnıkalyq retteý jáne metrologııa komıtetiniń Almaty qalasy boıynsha departamenti jeke tulǵanyń ótinishi negizinde «JARDI KZ» JShS qatysty jospardan tys memlekettik baqylaý júrgizdi, dep habarlaıdy QazAqparat.

Vedomstvonyń málimetinshe, shaǵymda 3 qazan kúni keshke ótinish berýshi osy kompanııaǵa tıesili dúkennen súzbe men aıran satyp alǵany kórsetilgen. Súzbeniń massasy oramdaǵy kórsetilgen massaǵa 0,5 kg sáıkes kelmedi. Tekserý barysynda osy dúkende satylatyn súzbe ónimniń massasyn kórsetpeı paketterge salynatyny anyqtaldy.

«Alaıda, súzbe satý kezinde fıskaldyq chekte 0,5 kg salmaq kórsetiledi. Sondaı-aq, dúkenniń saýda úı-jaıynda Shtrıh-baspa M15-2, 5D1I1 elektrondy tarazy qoldanylǵan. Jospardan tys tekserý kezinde salystyryp tekserý týraly sertıfıkaty da joq ekeni anyqtaldy, al keıinirek usynylǵan salystyryp tekserý týraly sertıfıkat jaramsyz dep tanylǵan. Osyǵan baılanysty materıaldar túpnusqalyǵy týraly kúmánmen tıisti organdarǵa jiberildi», - dep jazylǵan habarlamada.

«Ólshem birligin qamtamasyz etý týraly» Zańnyń 22-babyna sáıkes, ólsheý quraldary; saýda operatsııalaryn jasaý kezinde ıelikten shyǵarylatyn ónim sany; ony ótkizý kezinde kez kelgen túrdegi qaptamadaǵy býyp-túıilgen ónimniń sany memlekettik metrologııalyq baqylaý obektileri bolyp sanalady.

Budan basqa, Zańnyń 19-babyna sáıkes memlekettik metrologııalyq baqylaý obektileri bolyp tabylatyn ólsheý quraldary olardyń tıpi bekitilgennen nemese metrologııalyq attestattalǵannan jáne aınalymǵa shyǵar aldynda, jóndeýden keıin, paıdalaný kezeńinde ólshem birligin qamtamasyz etýdiń memlekettik júıesiniń tiziliminde tirkelgennen keıin salystyrylyp, tekseriledi.

«Joǵarydaǵy dúkende ornatylǵan tarazy salystyrylyp tekserýsiz qoldanylǵan jáne salystyrylyp tekserýden ýaqtyly ótpegen retinde qoldanýǵa jaramsyz dep tanylǵany anyqtaldy. Osy Zań talaptaryn buzǵany úshin «JARDI KZ» JShS «Ákimshilik quqyq buzýshylyq týraly» Kodekstiń 419-baby boıynsha 4 900 800 teńge somasyna ákimshilik jaýapkershilikke tartyldy, kemshilikterdi joıýǵa nusqama berilip, qaıta tekserý taǵaıyndaldy», - dep jazdy vedomstvo.

Sonymen qatar, departament JShS ókiline «Tehnıkalyq retteý týraly» zań talaptaryn buza otyryp, sáıkestikti baǵalaý jáne ónimdi aınalymǵa shyǵarýǵa tyıym salý týraly «sur» qujattardy alýǵa jol bermeý qajettigin, sondaı-aq «Ólshem birligin qamtamasyz etý týraly» zańǵa sáıkes salystyrylyp tekserýden ótpegen ólshem quraldaryn qoldanǵany úshin zańdy jáne jeke tulǵanyń jaýapkershiligin túsindirdi.