Tarazǵa bólingen qaıtarymsyz grant sany - 45, talasyp jatqandar 700-den kóp
«Taraz qalasy ákimdiginiń halyqty jumyspen qamtý ortalyǵy» kásipkerlikti qoldaý bóliminiń basshysy Dınara Baıanovanyń aıtýynsha, jobanyń birinshi kezeńi boıynsha jańa bıznes ıdeıalardy iske asyrýǵa nıetti qala turǵyndarynyń sany 728-ge jetken. Biraq, 400 aılyq eseptik kórsetkish, ıaǵnı 1 mıllıon 380 myń teńgeniń qaıtarymsyz grantyna berilgen lımıt sany – 45.
«Ótinimderdiń 278-iniń bıznes jobasy mal sharýashylyǵy, 170-i kondıterlik ónimder, 80-i tigin isin, 60-y sulýlyq salonyn, 45-i kompıýterlik qyzmet kórsetý ortalyqtaryn ashýǵa qurylsa, 57-si emshara kabınetterin ashý, 40-y ózge qyzmet túrlerin tańdaǵan. 9-20 naýryz aralyǵynda ótken irikteý kezeńinde 728 úmitkerdiń 638-i kelip ózderiniń bıznes jobalaryn qorǵady. 90-y belgisiz sebeptermen komıssııa otyrysyna kelmedi», – deıdi bólim basshysy.
Aıta keteıik, buǵan deıin Jambyl oblysynda 700 mln dollardyń memorandýmdaryna qol qoıylyp, 20-ǵa jýyq kelissóz júrgizildi dep habarlaǵan bolatynbyz.
