Tarazdyń «Uly Dala» shaǵynaýdanynda turǵyndar tońyp otyr

TARAZ. QazAqparat - Jambyl oblysynyń ákimi Nurjan Nurjigitov Taraz qalasyndaǵy 15-shaǵynaýdanda bolyp, jylý júıesiniń keńeıtý jumysymen tanysty, dep habarlaıdy QazAqparat.

Aıta keteıik, buǵan deıin atalǵan shaǵynaýdandaǵy keıbir kópqabatty turǵyn úılerdegi jylytý máselesi áleýmettik jelide kóterilgen bolatyn.

Naqtyraq aıtqanda, turǵyndar páterdegi jylý temperatýrasynyń tómendigine shaǵymdanǵan.

Soǵan sáıkes qalalyq qurylys jáne turǵyn úı qatynastary bólimderiniń qyzmetkerleri «TarazTransEnergo» mekemesiniń mamandarymen birlesip turǵyn úılerdiń jertólesindegi jylý toraptaryna tekserý júrgizgen.

Taraz qalasynyń ákimi Bekbolat Orynbekovtiń aıtýynsha, tekserý kezinde berý qubyry men qaıtarý qubyryndaǵy qysym birdeı ekendigi, ıaǵnı, salqyndatqyshtyń aınalym qozǵalysy joqtyǵy anyqtalǵan.

Osyǵan baılanysty, «TarazTransEnergo» kásipornyna jylý trassasynda aınalymdy arttyrý úshin magıstraldyq keri jylý jelisine sorǵy ornatý usynylǵan.

«QurylysInvestJoba» JShS jobalaý uıymyna sorǵy stantsııasyn ornatý ornyn tańdaý jáne sorǵylardyń qýatyn esepteý boıynsha tıisti tapsyrmalar berilgen.

Oblys ákimi qys mezgilindegi jylý deńgeıiniń tómendigine qatysty turǵyndardyń shaǵymy oryndy ekenin atap ótip, bul máseleni bir apta ishinde sheshýdi tapsyrdy.

Jaýaptylarǵa jan-jaqty jumys júrgizip, jedel shara qabyldaý boıynsha naqty mindetter júkteldi.