Tarazdyń shetki aýdany men saıajaılarynyń túıtkilderi sheshimin tabady
TARAZ. QazAqparat – Jambyl oblysynyń ákimi Berdibek Saparbaev Taraz qalasy men tıisti basqarmalardyń basshylaryna oblys ortalyǵynyń shetki aýdany men saıajaı alqaptarynyń qordalanǵan máselelerin sheshý boıynsha jospar-kestesin ázirleýdi tapsyrdy, dep habarlaıdy QazAqparat oblys ákiminiń baspasóz qyzmetine silteme jasap.
Berdibek Saparbaev alqap turǵyndarmen kezdesýler ótkizip, olarǵa túıindi túıtkilderdiń jergilikti bıýdjettiń múmkinshiligine qaraı kezeń-kezeńimen sheshiletindigin ashyq túsindirýdiń mańyzdylyǵyn basa aıtty.
Aımaq basshysy áleýmettik mekemeler men qajetti ınfraqurylymdardyń qurylysy qomaqty qarjyny talap etetinin, degenmen ózekti máselelerdi sheshý úshin kez kelgen jaǵdaıda tıisti sharalardy qabyldaý kerektigine nazar aýdartty. Bul oraıda basty talap – júktelgen mindetterdi ýaqtyly oryndaý, halyqpen ashyq dıalog júrgizý.
Taraz qalasynyń ákimi Aıtqazy Qarabalaevtyń aıtýynsha, shalǵaı Qarasý turǵyn úı alabynda 25 kelýshige arnalǵan dárigerlik ambýlatorııanyń qurylysyn júrgizý, odan ári jumys isteýin jergilikti kásipkerdiń biri óz moınyna alyp otyr. Ol úshin arnaıy jer telimi de bólingen. Emdeý mekemesiniń qurylysy aǵymdaǵy jyly bastalyp, aıaqtalady dep kútilýde. Ambýlatorııa kelisimshartqa sáıkes senimgerlik basqarýǵa berilmek.
Sondaı-aq, qazirgi tańda Qarasýda turatyn 2 388 bala qalanyń túrli bilim shańyraǵyna qatynap oqýda. Sondyqtan jańa mektep salý qajettigi týyndap otyr. Aldyn ala esepke sáıkes bul nysan jobasynyń quny 2,1 mlrd teńgeni qurap otyrǵandyǵy aıtyldy.
- 600 oryndyq mektep úshin bul óte joǵary baǵa. Joba qunyń qaıta qaraý kerek, - dep atap ótti oblys ákimi.
Bul oraıda aımaq basshysy qurylys tek kelesi jyly, qujattamalar men memlekettik saraptamanyń qorytyndysy daıyndalǵannan keıin bastalýy múmkin ekendigi alǵa tartyp, ázirge balalardy tasymaldaý isin durys uıymdastyrý qajettigine kóńil bóldi.
Shalǵaı Qarasýdyń jeti jańa turǵyn úı alabynda aýyz sý men elektr jelilerin tartý qajet. Ol jumystar bıýdjetten birinshi kezeńde 570 mıllıon teńge, ekinshi kezeńde 450 mıllıon teńge qarastyrýdy talap etedi. Tıisti qujattar daıyndalý ústinde. Jobalardy júzege asyrý kelesi jyldyń joparynda.
Barlyq joldary birden asfalttaý múmkin emes, sondyqtan birqatar kóshelerge qıyrshyq tas tóselse, keıbir joldar aǵymdaǵy jyly jóndeýden ótpek.
Aıtqazy Qarabalaev jeke avtobýs parkteriniń qoǵamdyq kólikteri shetki aýdandarǵa qatynaı bermeıtinin atap ótip, kelesi konkýrs talaptarynda osyndaı tıimdilikterdi eskerý kerektigin jetkizdi.
Qarasýdaǵy taǵy bir másele – jergilikti kóshelerdiń tarylýy. Ondaǵy kóptegen turǵyndardyń ruqsatsyz ár túrli sharýashylyq qurylystaryn júrgizýi qoǵamdyq kólikterdiń qozǵalysy úshin yńǵaısyzdyq týǵyzýda.
Bul máseleler qalanyń barlyq saıajaı alqaptaryna ortaq. Alqaptardy elektr jelilerimen qamtýǵa 1,5 mıllıard teńge, aýyz sýmen qamtamasyz etýge 2 mıllıard teńge qajet.
- Tarazdyqtar qoǵamdyq kólikterdiń jaǵdaıyna jáne olardyń jumys kestesine shaǵymdanýda. Shaǵyn avtobýstardy yńǵaıly otandyq kóliktermen aýystyrý kerek. Qoǵamdyq kólik keminde 22:00 saǵatqa deıin jumys isteýge minddeti, bul talap kelisimshartta naqty jazylýy tıis. Bıýdjettik baǵdarlamalar ákimshilerine osy sharttyń oryndalýyn qatań baqylaýda ustaǵany abzal, - dep atap ótti óńir basshysy.
Berdibek Saparbaev osy máseleni Taraz qalasy ákiminiń tıisti orynbasaryna jolaýshylardyń shaǵymdaryna nazar aýdaryp, tasymaldaýshylarǵa qatań shara qoldanýdy tapsyrdy.
Jıyndy qorytyndylaǵan oblys ákimi saıabaqtardy, skverler men alleıalardy oblystyq basqarmalarǵa bekitý, Taraz turǵyndaryn tarta otyryp, aýqymdy senbilikter ótkizýdi bastaý týraly tapsyrmasyn qaıta nyqtady.
