Tarazdyń ózindik brendi bolýy tıis – Berdibek Saparbaev
Tarıhy baı, erekshe mádenı-tarıhı oryndar men tabıǵı resýrstarǵa ıe bola tura oblysymyz áli kúnge deıin týrızmdi damytýda birqatar kedergilerdi keshirýde. Ótken tarıhy tereń óńir aldynda barsha qazaqstandyqtar men sheteldikterdi tartýǵa qabiletti qazirgi zamanǵa laıyq týrızm ındýstrııasyn qurý máselesi tur. Bul týraly basqosý barysynda aımaq basshysy Berdibek Saparbaev atap ótti.
Týrızm basqarmasy osy oraıdaǵy máselelerdi sheshý úshin salany damytýdyń 2020-2022 jyldarǵa arnalǵan strategııalyq josparyn ázirleýde.
Basqarma basshysy Ǵanı Maılybaevtyń aıtýynsha, bul baǵytta birneshe jobany júzege asyrý josparlanǵan. Bes tilde aýdıo jáne beınegıdteri bar «Taraz tour» mobıldik qosymshasyndaǵy týrıstik nysandar sanyn 200-ge deıin arttyrý kózdelýde. Qazirgi tańda qosymshadan tek 37 nysandy tabýǵa bolady. Sondaı-aq jaqynda «Áýlıeata» áýejaıyna Taraz týraly tolyq aqpar beretin smart-dúńgirshekter ornatylmaq.
Basqarma sonymen qatar aýdıo jáne vıdeo nusqaýlyǵy bar eki qabatty avtobýsty marshrýtqa shyǵarmaq. Taraz áıgili «2GIS» mobıldi qosymshasyna (sandyq karta) qosylady. Bul týrısterge basqalardyń kómeginsiz ózderine kerek jerlerdi taýyp, durys baǵyttaǵy avtobýsqa otyrýǵa kómektesedi. 200 týrıstik nysanda QR-kodtary ornatylady.
Bıyl Aısha bıbi, Qarahan, Babaja-Hatýn keseneleri, Kereı men Jánibek eskertkishteri, Aqyrtas jáne Tekturmas etnotarıhı kesheni sııaqty bes tarıhı-mádenı nysandarda qaıta jańǵyrtý jumystary bastalady. Etnoaýyldar salý boıynsha ınvestorlarmen kelissózder júrgiziletin bolady.
Berdibek Saparbaev Taraz qalasynyń myńjyldyqtar toǵysyndaǵy shahar ekenin kórsetetin ózindik brendi kerek ekenin atap ótti. Sondaı-aq, tıisti memlekettik organdar, týrıstik kompanııalar men qaýymdastyqtar birlesip týrızm ındýstrııasynyń áleýetin arttyrý úshin júıeli negizde jumys júrgizýi qajettigin atap ótti.
– Ókinishke qaraı meıramhanalar men kafelerde qyzmet kórsetý deńgeıi tómen, bul kelýshilerdiń senimsizdigin týdyrady. Jol boıyndaǵy servıs kóńil kónshitpeıdi. Josparlanǵan toǵyz servıstik keshenniń bireýi ǵana Baızaq aýdanynda salyndy. Qalǵan aýdan ákimderi olardyń qurylysyn tezirek aıaqtaýdy nazarǵa alýy tıis.
Oblysymyzdyń qolaıly aımaqta ornalasqandyǵyn utymdy paıdalanbaımyz. «Batys Eýropa – Batys Qytaı» avtodálizi bizdiń óńir arqyly ótedi. Ol jolmen kún saıyn myńdaǵan kólik qatynaıdy. Otardan Jýalyǵa deıin Áýlıeatanyń qasıetti oryndary týraly aqparattar jazylǵan bılbordtar ornatý kerek. Koronavırýstyq pandemııa ishki týrızmniń damýyna úlken múmkindikter beredi. Buǵan deıin tanymal bolyp kelgen sheteldik kýrorttar burynǵydaı asa qyzyǵýshylyq týdyrmaıdy. Muny ishki týrızmniń damýyna serpin syılaý úshin tıimdi paıdalana bilgen abzal, – dep qorytyndylady Berdibek Saparbaev.
