Tarazdyń óz «jasyl beldeýi» bolady
TARAZ. QazAqparat - Jambyl oblysy ákimdiginiń kezekti otyrysynda oblys ortalyǵynyń aınalasyndaǵy aýmaqty abattandyrý jobalary talqylandy. Bul týraly aımaq basshysynyń baspasóz qyzmetinen málim etti, dep habarlaıdy QazAqparat tilshisi.
Betpaq dala tabıǵı alqabynda ornalasqan Taraz qalasyn Talas Alataýy, Qarataý taýlary men Tekturmas bıigi qorshap tur. Tarazdyń aınalasynda demalys oryndaryn ashýǵa qolaıly kóptegen kórikti jerler, taý shatqaldary, ózen-kólder bolýyna qaramastan, qala turǵyndary demalatyn jer tappaı qınalady.
Otyrys barysynda jaýapty mamandar Taraz qalasy bas josparyn iske asyrý kezeńderi týraly aıtty. Birinshi kezeńde jańa bas jospar jasalyp, qala mańyndaǵy aýmaqtardy abattandyrý jobasy ázirlenedi. Mamandar Baızaq jáne Jambyl aýdandary aýmaqtarynyń oblys ortalyǵyna japsarlas jatqan bólikterin qosýdy usyndy.
Óńir basshysy Asqar Myrzahmetov ázirge jańa bas josparǵa qajettilik joqtyǵyn aıtty. Biraq zańnyń talaby boıynsha, kezekte turǵan azamattarǵa oblystyń kez kelgen núktesinen 0,01 gektar jerdi berýge bolatynyn bildirdi.
Sondaı-aq aldaǵy ýaqytta atalǵan aýdandardyń aýmaqtarynda túrlishe demalys oryndaryn ashý josparlanǵan.
Oblys ákimi Asqar Myrzahmetov qala mańyndaǵy qurylysqa jaramsyz jerlerge aǵash otyrǵyzý qajettigin aıtyp, «jasyl beldeý» qurýdy tapsyrdy.
Budan tys, óńir basshysy Talas ózeniniń Taraz qalasynyń mańyndaǵy jaǵalaýlaryn tıimdirek paıdalaný qajettigin atap kórsetti.
Aıta keteıik, Taraz qalasy búginde batys jáne soltústik-batys baǵyttarda damyp keledi. Buǵan - bıyldyń ózinde 14 jáne 15-shaǵyn aýdandardyń salynyp jatqany aıǵaq.
