Tarazdyń ortalyq «Dostyq» alańyna Elbasynyń esimi beriledi

TARAZ. QazAqparat - Taraz qalasyndaǵy «Dostyq» alańyna QR Tuńǵysh Prezıdenti Nursultan Ábishuly Nazarbaevtyń esimi beriletin boldy. Bul mańyzdy sheshim qalalyq máslıhattyń turaqty komıssııa otyrysynda qabyldandy, dep habarlaıdy QazAqparat tilshisi.

Aıta keteıik, Qasym-Jomart Toqaev oblys ortalyqtaryndaǵy iri kóshelerdiń birin Elbasynyń atymen ataý týraly bastama kótergen bolatyn. Osyǵan sáıkes, shahardaǵy Tóle bı dańǵylyna QR Tuńǵysh Prezıdenti esimin berýdi oblystyq máslıhattyń kezekten tys 33-sessııasynda bekitken. Biraq, respýblıkalyq onomastıkalyq komıssııa Jambyl, Atyraý, Aqtóbe, Qostanaı oblystary ákimshilik ortalyqtaryndaǵy jańa ataýdy ıelenetin obektiler men kóshelerdi anyqtaı otyryp, qaıta qaraý qajettigin alǵa tartqan edi.

Osyǵan oraı, turaqty komıssııa otyrysynda «Dostyq» alańynyń ataýyn Nursultan Nazarbaev alańy dep ózgertý týraly usynys talqylanyp, qatysýshylar biraýyzdan qoldap maquldady. Bul usynysty Taraz qalalyq ákimdigi men máslıhaty birlesip berip otyr.