Tarazdyń hımııa zaýyttary qaladaǵy ystyń ıisine qatysy joqtyǵyn málimdedi
TARAZ. QazAqparat - Taraz turǵyndary qalanyń ońtústik-batys bóliginen shyǵyp jatqan ystyń ıisine jáne tútinniń taralýyna shaǵymdanyp jatyr, dep habarlaıdy QazAqparat tilshisi.
Eske sala keteıik, shilde aıynyń basynan beri Taraz turǵyndary túrli ınstantsııalarǵa kúıiktiń ıisine shaǵym túsirip jatqany habarlanǵan bolatyn.
Áleýmettik jelilerdegi Tarazdyń toptarynda bul másele keńinen talqylanýda. Turǵyndar kúıiktiń ıisi oblys ortalyǵyna jaqyn jerde ornalasqan «Qazfosfat» JShS-niń mıneraldy tyńaıtqyshtar zaýytynan shyǵyp jatqanyn boljap otyr.
«QazAqparat» HAA tilshisiniń Jambyl oblystyq tótenshe jaǵdaılar departamentine joldaǵan resmı saýalyna bergen jaýapta osy nusqa rastaldy.
«QazAqparat» HAA tilshisine telefon arqyly suhbat bergen «Qazfosfat» JShS bas dırektory Muqaş Eskendir hımııa zaýytynyń bul jaıtqa eshqandaı qatysy joq ekenin aıtty.
«Qazfosfat 65 jyldan beri sol jerde tur, tútin qaı jaqtan shyǵyp jatqanyn kórýge bolady. Adamdar jazyp jatqan shaǵymdardy men de oqyp otyrmyn, ásirese Hımııa aýylyndaǵylar ol jaqta birdeńeni jaǵyp jatqanyn aıtyp jatyr. Biraq bıikten tútinniń qaıdan shyǵyp jatqanyn kórýge bolady. Bizde negizinen sýdyń býy shyǵady. Bizdiń buǵan qatysymyz joq», - dep sendirdi JShS basshysy.
«Qazfosfat» JShS dırektsııasynyń bergen málimetterine súıensek, óńirdiń hımııa kásiporyndarynda qorshaǵan ortaǵa keri áserdi azaıtý maqsatynda fosfor qaldyqtaryn elektrtermııalyq peshterde joıý, arnaıy tazartý oryndary, fıltrler sııaqty tabıǵatty qorǵaýǵa arnalǵan birqatar sharalar iske asyrylady.
«Qazfosfat» JShS fılıaly «Mıneraldyq tyńaıtqyshtar» zaýyty aýyl sharýashylyǵy úshin azyqtyq ftorsyzdandyrylǵan fosfat, mıneraldyq tyńaıtqyshtar shyǵaratyn hımııalyq zaýyt bolyp tabylady.
