Tarazdyń ejelgi mádenıetine arnalǵan etno-tarıhı keshen qurylysynyń birinshi kezeńi aıaqtaldy
«Tekturmasty» jańǵyrtý jumystarynyń birinshi kezeńi aıaqtaldy. Baqylaý alańdary boı kóterip, Áýlıe-Atanyń 13 metrlik músini, 10 metrlik Laýha (skıpetr), qaǵandardyń esimderi jazylǵan han shatyrlary túrindegi 14 eskertkish ornatylǵan. Alaıda, keshende jańa nysandar men arhıtektýralyq formalardy salý boıynsha kúrdeli jumys áli bitpegen.
Oblys ákimdiginiń sáýlet jáne qala qurylysy basqarmasynyń basshysy Arman Ábdeshov «Tekturmas» keshenin qaıta qurýdyń ekinshi kezeńin júzege asyrý barysy týraly baıandady.
Jospar boıynsha eski bekinis jóndelip, alleıa boıynda aımaqtyń tarıhı qurylymdarynyń maketteri oryn teppek. Munda jaǵajaı, jasandy sarqyrama jáne kásipkerlik nysandary da salynady dep kózdelip otyr. Olar keshenniń mańyndaǵy Talas ózeniniń jaǵasynan boı kóteredi.
Berdibek Saparbaev Tekturmas kesheni aýmaǵynda órbigen aýqymdy qurylys jumystary nysannyń otandyq jáne sheteldik týrıster úshin tartymdylyǵyn arttyrýǵa baǵyttalǵanyn atap ótti.
«Etno-tarıhı keshende biregeı sáýlettik ıdeıany júzege asyrýǵa múmkindik týdy. Mundaǵy árbir nysan Ejelgi Tarazdyń mádenıetin aıshyqtaıdy. Sáýletshiler barynsha qalanyń tarıhı kelbetin, sol ýaqyttaǵy beınesin kelistirýge kúsh jumsaýy kerek, sonda kelýshiler ótkenge saıahat jasaı alady. Sonymen qatar, keshende kelýshilerge barlyq qolaıly jaǵdaıdy jasalyp, zamanaýı tehnıkalyq talaptarǵa saı bolýy tıis», - dep atap ótti oblys ákimi.
Týrısterdiń kópshiligin mundaǵy Atlah jáne Ańyraqaı shaıqastaryna arnalǵan panoramalyq soǵys paneli qyzyqtyrýy tıis. Onyń jobasy ázirlenip jatyr.
«Osy shaıqastardyń tarıhyn egjeı-tegjeıli sıpattańyzdar. Jastarǵa shaıqastardyń qalaı ótkenin, búgingi beıbit kúnge qandaı qıynshylyqpen jetkenimizdi túsindirýimiz kerek», - dedi oblys ákimi.
Berdibek Saparbaev oblys ortalyǵyn aralaý barysynda sý sharýashylyǵy nysandarynyń máselelerimen de tanysty. Ol Túıte, Úshbulaq, Qapal kanaldary men Aısha bıbi kóshesinde ornalasqan drenajdy kanaldyń jaı-kúıin jan-jaqty barlady.
Óńir basshysy ırrıgatsııalyq jáne drenajdyq júıelerdi jetildirý boıynsha tıisti tulǵalarǵa naqty tapsyrmalar júktedi.
Sonymen qatar, «Zerbulaq» demalys aımaǵynda Berdibek Saparbaev jaǵalaýdy nyǵaıtýdy, kóshetter otyrǵyzýdy tapsyrdy.
«Taraz ÁKK» AQ basqarma tóraǵasy Oljas Qarjaýov osy baǵytta ınvestorlarmen kelissózder júrgizilip jatqanyn habarlady. Olar óz qarajattaryn sala otyryp, bul aımaqty qaladaǵy tanymal demalys oryndarynyń birine aınaldyrýǵa daıyn ekendigin jetkizdi.
