Tarazdyqtar jarylystan qaza tapqan jerlesterin eske alyp, gúl qoıyp jatyr
TARAZ. QazAqparat – Tarazdyqtar Jambyl oblysynyń Baızaq aýdanynda jarylys saldarynan qaza bolǵan qutqarýshylardyń qurmetine gúl qoıyp jatyr, dep habarlaıdy QazAqparat tilshisi.
Oblystyq tótenshe jaǵdaılar depatamentiniń Іnstagram paraqshasynda estelik buryshynyń mekenjaıy jarııalandy.
«Aza tutý rásimi Taraz qalasynyń №1 Mamandandyrylǵan órt sóndirý bóliminiń aýmaǵynda ótti. Qaharmandarǵa áriptesteri, týǵan-týystary men qalamyzdyń janashyr turǵyndary qurmet kórsetýge jınaldy.
Qaıǵyly oqıǵa bizdiń 5 úzdik áriptesimizdiń, kásibı mamandardyń ómirin qıdy. Marqumdar áriptesteri men dostarynyń júreginde saqtalary sózsiz. Tótenshe jaǵdaılar departamentiniń ujymy atalǵan qaıǵyly oqıǵadan zardap shekkenderdiń otbasylaryna qaıǵyryp kóńil aıtady. Olardyń esimi kóńilderde máńgilik saqtalady.
Estelik buryshtary Taraz qalasy, Jeltoqsan kóshesi 13, Taraz qalasy, Qarataý shaǵyn aýdany 42, № 1 mekenjaılarynda ornalasqan», - dep jazylǵan. departamenttiń málimetinde.
Eske salsaq, búgin jambyldyqtar «Halyq qaharmany» Meıirjan Aımanovty aqtyq saparǵa shyǵaryp saldy .
Oǵan QR Prezıdenti Qasym-Jomart Toqaevtyń Jarlyǵymen «Halyq qaharmany» ataǵy berilgen bolatyn.
Sondaı-aq, QR Prezıdenti Qasym-Jomart Toqaevtyń Jarlyǵymen áskerı jáne qyzmettik boryshyn atqarýda kórsetken erligi men janqııarlyǵy úshin Jambyl oblysyndaǵy áskerı qoıma jarylysynda qaza tapqan azamattar memlekettik nagradamen marapattaldy.
