Tarazdyqtar túrmege uıaly telefon kirgizýdiń tyń jolyn tapqan
ASTANA. QazAqparat - Taraz qalalyq sotynda nan tasýshy kóliktiń ıesine qatysty azamattyq is qaraldy, dep xabarlaıdy QazAqparat tilshisi.
Sot materıaldaryna sáıkes, Jambyl oblysy boıynsha qylmystyq atqarý júıesi departamentine qarasty 158/7 kolonııasynyń kólik ótkizý beketinde S. esimdi nan tasýshysynyń kóliginen «Nokia-107» markaly uıaly telefon tabyldy.
Atalǵan baılanys quralyn «Gaz 3309»-dyń artqy bamperine tyqqan. Osylaısha, kólik júrgizýshisi QR Ákimshilik quqyqbuzýshylyq kodeksiniń 481 baby, 1-tarmaǵy boıynsha qylmystyq-atqarý júıesi mekemelerinde otyrǵan tulǵalarǵa paıdalanýǵa ruqsat berilmegen zattardy jetkizgeni úshin aıyptaldy.
«Sot sheshimine sáıkes, S. esimdi azamat kináli dep tanylyp, 10 aılyq eseptik kórsetkish, 22 690 teńge kóleminde aıyppul tóleýge mindetteldi. Uıaly telefon tárkilendi. Sot qaýlysy kúshine endi», - delingen qalalyq sottyń úkiminde.
