Tarazdyq JOO-nyń ustazdary Elbasy Joldaýyna oraı pikir bildirdi
ASTANA. QazAqparat - Búgin Taraz memlekettik pedagogıkalyq ınstıtýtynda Memleket basshysy Nursultan Nazarbaevtyń Qazaqstan halqyna arnaǵan Joldaýyn talqylaý maqsatynda jıyn ótti. Bul jaıynda TarMPI-dyń Aqparattyq-ımıdjdik qyzmetiniń basshysy Jandar Asan málim etti, dep habarlaıdy QazAqparat.
Onyń aıtýynsha, alqaly basqosýda oqý ornynyń professor-oqytýshylary men jas ǵalymdary bıylǵy jylǵy strategııalyq mańyzdy qujattyń bilim salasynyń damýyna jol ashatyn baǵyttaryna keńirek toqtalyp, úsh tilde bilim berý máseleleri jaıyndaǵy pikirlerimen bólisti.
«Úsh tuǵyrly til» saıasaty ınstıtýttyń Damý strategııasynda aıqyn kórsetilgen. Sebebi, úsh tilde bilim berý búgingi zaman talaby, básekege qabiletti elder qataryna aparar basty baspaldaqtardyń biri. 2012 jyldan bastap oqý ornymyzda kóp tilde bilim berý baǵdarlamasy boıynsha muǵalim mamandardy daıarlaý jumystary atqarylýda. Kórsetilgen maqsattarǵa jetý úshin birqatar mindetter júzege asyrylýda. Máselen, ınstıtýtta kóp tildi orta jasaý, úsh tilde oqytýdy engizý jáne aǵylshyn tilinde oqýlyqtar shyǵarý qolǵa alynǵan. Sonymen qatar, tarıh, matematıka, ınformatıka jáne hımııa mamandyqtarynyń stýdentteri kóp tilde bilim berý júıesi boıynsha oqytylýda. Aldaǵy oqý jylynda taǵy 4 mamandyqqa atalǵan baǵdarlama engizilmek. Úsh tilde bilim berýde birqatar qomaqty nátıjelerge de qol jetkizdik. Elbasynyń bıylǵy Joldaýynda úsh tildi oqýǵa kezeń-kezeńimen kóshý máselesi boıynsha usynystar ázirlený kerektigi, onyń ishinde qazaq tiliniń basymdyǵyn saqtaýǵa jáne ári qaraı damýyna zor kóńil bólinetindigi aıtyldy. Bul búginde kezek kúttirmeıtin ózekti másele ekendigi ras», dep atap ótken jıynǵa qatysýshylar.
Sonymen qatar, keleli keńeste bilikti muǵalim daıarlaý máselesi de qozǵalyp, Elbasy júktegen mindetterdi oqý ornynda júzege asyrýdyń naqty baǵyttary belgilendi.
Atap aıtqanda, úsh tilde bilim berýdi odan ármen damytý, joǵary oqý ornynyń kadrlyq quramyna, materıaldyq-tehnıkalyq jabdyqtalý deńgeıine, bilim berý baǵdarlamalaryna qatysty baqylaý men talapty kúsheıte túsýge basa nazar aýdaryldy.
«Keńes sońynda Memleket basshysynyń Joldaýyn ınstıtýt ujymyna túsindirý jáne naqty júzege asyrý sharalary bekitildi», - dedi Jandar Asan.
