Tarazdyq jol polıtseıler planshetterge kóshti

TARAZ. QazAqparat - Jambyl oblystyq prokýratýrasy ÁQBT (Ákimshilik quqyq buzýshylardyń biregeı tirkelimi) baǵdarlamasyn tanystyrdy. Ol quqyq buzýshylardyń hattamalaryn elektrondyq formatta rásimdeýge múmkindik beredi, dep habarlaıdy «QazAqparat» HAA tilshisi Jambyl oblystyq qadaǵalaý organnyń baspasóz qyzmetine silteme jasap.

Prokýrorlardyń bastamasymen Taraz qalasynyń ákimdigi ÁQBT qosymshasyn ornatý úshin alǵashqy 15 uıaly qurylǵy jıyntyǵyn satyp aldy jáne jol polıtsııasy qyzmetkerlerine hattamalardy elektrondyq formatta rásimdeýge úıretýdi uıymdastyrdy. Búginnen bastap jol polıtsııasy qyzmetkerleri quqyq buzýshylardy osy planshetter arqyly rásimdeıdi, dep túsindirdi vedomstvonyń baspasóz qyzmeti.

«Elektrondyq hattamaǵa ótýdiń basty artyqshylyǵy - azamattar úshin yńǵaıly. Endi olar polıtsııa ǵımaratynyń, aıyppuldy tóleý úshin bankterdiń tabaldyryǵyn tozdyrmaıtyn bolady», - dep atap ótti Taraz qalasynyń prokýrory Bekzat Seıilhanov.

Qazir tek 15 qurylǵy satyp alyndy, bolashaqta jol polıtseıleri elektrondyq óndiriske tolyqtaı kóshedi, dep naqtylady Jambyl oblystyq prokýratýrasynyń baspasóz qyzmeti.