Tarazdyq jas balýan qazaq kúresinen álem chempıony atandy
ASTANA. QazAqparat - Qytaıdyń Úrimji qalasynda qazaq kúresinen ótken álem chempıonatynda 80 kelige deıingi salmaq dárejesinde Taraz memlekettik pedagogıkalyq ınstıtýtynyń stýdenti Dáýlet Pahledınov jeńiske jetip, altyn medal ıelendi.
Bul týraly atalǵan oqý ornynyń Aqparattyq-ımıdjdik qyzmeti habarlady.
Úsh kúnge sozylǵan baıraqty básekege 28 elden 205 sportshy qatysty. Altynshy ret ótkizilip otyrǵan álem chempıonatynda bes salmaq dárejesinde synǵa túsken qazaqstandyq balýandar sátti óner kórsetip, bes altyn, bir qolaǵa qol jetkizdi. Tarazdyq jas balýan fınalda estonııalyq qarsylasynan upaı sanymen basym túsip, jeńis tuǵyryna kóterildi.
«Jambyl oblysy ákimdiginiń dene shynyqtyrý jáne sport basqarmasy janyndaǵy «Qazaq kúres klýbynyń» múshesi bolyp tabylatyn Dáýlet kelesheginen úlken úmit kúttiretin sportshy. Ol buǵan deıin birneshe sporttyq dodalarda jeńis tuǵyrynan kórindi. Aldaǵy ýaqytta da talaı qarsylasyn shań qaptyratynyna senimdimin. Óıtkeni, ol óte eńbekqor jáne tózimdi. Atalmysh qasıetter sportta kóp nársege qol jetkizýge zor múmkindik beredi», deıdi Jambyl oblysynyń bas bapkeri Rýslan Muhamedgalıev.
D. Pahledınov buǵan deıin sambodan jáne qazaq kúresinen Qazaqstan chempıony, álem chempıonatynyń qola júldegeri jáne «ІІ Dúnıejúzilik kóshpeliler oıyndarynyń» jeńimpazy atanǵan bolatyn.
