Tarazdyq jas balýan Halyqaralyq týrnırdiń jeńimpazy atandy
ASTANA. QazAqparat - Taraz memlekettik pedagogıkalyq ınstıtýtynyń stýdenti Bekádil Shaımerdenov «International Masters Bremen» atty jasóspirimder arasyndaǵy dzıýdodan XXXI Halyqaralyq týrnırde 73 keli salmaq dárejesinde Álem chempıony atandy. Bul týraly TarMPI Aqparattyq-ımıdjdik qyzmeti habarlady.
Balǵyn balýan fınalda japondyq qarsylasynan basym túsip, jeńis tuǵyryna kóterildi. Baıraqty básekege atalǵan salmaq dárejesi boıynsha 23 memlekettiń 90-nan astam sańlaqtary qatysqan. «Bekádil úshin sporttyń osy túriniń keleshegi zor. Ol jastyǵyna qaramaı kóptegen belesti baǵyndyryp úlgerdi. Aldaǵy ýaqytta da talaı qarsylasyn shań qaptyratynyna senimdimin. Óıtkeni, ol óte eńbekqor jáne tózimdi. Atalmysh qasıetter sportta kóp nársege qol jetkizýge zor múmkindik beredi», deıdi bapkeri Rahymjan Qojataev.
Aıta keteıik, Germanııanyń Bremen qalasynda 1996-1997 jyldary týǵan jasóspirimder arasyndaǵy dzıýdodan ótken halyqaralyq jarysta B. Shaımerdenov jarys jolynda Frantsııa, Ózbekstan, Japonııa sportshylarynan basym tústi. Balǵyn sportshy buǵan deıin sporttyq jáne áskerı sambodan jastar arasynda ótken ashyq Azııa chempıonatynda, dzıýdo kúresinen jastar arasynda ótken el birinshiliginde chempıon atanǵan bolatyn.
