Tarazdyq zeınetkerdiń 8 myń dollaryn jymqyrǵan alaıaq ustaldy
TARAZ. QazAqparat - Tarazda talaıdy qan qaqsatqan alaıaq áıel ustaldy. Ol sońǵy ret zeınetkerdiń 8 myń dollary men 120 myń teńgesin jymqyrǵan, dep habarlaıdy QazAqparat.
Belgili bolǵandaı, kúdikti - 39 jastaǵy áıel. Ol 68 jastaǵy zeınetkermen kóshede kezdeısoq tanysyp, onyń senimine kirgen. Qart kisiniń aqshasy baryn bilip, aldyn ala teńgesin berseń, dúkennen 30 paıyz jeńildikpen turmystyq tehnıkany alýǵa bolady dep úgittegen. Tipti lotereıaǵa qatyssań, tolyq somany qaıtaryp alasyń dep te sendiredi. Osy jalǵan sózge ılana qalǵan ańqaý zeınetker bankomattaǵy 120 myń teńgesi men depozıtten 8 myń dollaryn sheship bere salǵan. Al odan keıin ýáde bergen adamy ushty-kúıli joǵalǵan. Túk túsinbeı qalǵan keıýananyń shaǵymynan soń izdeýge kirisken polıtseıler, alaıaqty kórshi Túrkistan oblysynda qolǵa túsirgen.
"Kúdikti Shymkent qalasynyń móltekaýdandarynyń birinde ustalǵan. Ol óziniń kinásin tolyq moıyndady. Qazirgi tańda Taraz qalasyna jetkizilip, osyǵan uqsas basqa qylmystarǵa qatystylyǵy tekserilip jatyr", - deıdi Jambyl oblystyq polıtsııa departamentiniń baspassóz hatshysy Gúlsara Muhtarqulova.
Qazir kúdiktiniń sybaılastary bar-joǵy anyqtalyp jatyr.
Avtory: Ǵıbrat Sembaı
