Tarazdyq volonterler turǵyndarǵa baýyrsaq úlestirdi

TARAZ. QazAqparat – Tarazdaǵy «Mart» saýda ortalyǵynda Abaı atyndaǵy Jambyl gýmanıtarlyq kolledjiniń «Meıirimdi júrek» qozǵalysynyń eriktileri 1 naýryz - Alǵys aıtý kúnine oraı «Alǵysym sheksiz» aktsııasyn ótkizdi, dep habarlaıdy QazAqparat.

Stýdentterdiń fleshmobymen bastalǵan aktsııa barysynda eriktiler Qazaqstanda turatyn etnostardyń ulttyq án-bıin oryndap, J.Moldaǵalıevtiń «Men qazaqpyn» atty kompozıtsııasyn sahnalady.

Sondaı-aq, uıymdastyrýshylar kórermenderge ózge ult ókilderiniń salt-dástúrine qatysty suraqtar joldap, durys jaýaptarǵa syılyqtar úlestirdi.

Odan bólek, saýda ortalyǵyna kelýshilerge baýyrsaq usynyp, qazaqtyń ulttyq dáminen aýyz tıgizdi.

Jastar arasynda ultaralyq tatýlyqty saqtaýǵa yqpal etý, rızashylyq, alǵys týraly túsinikterin keńeıtip, izettilikke tárbıeleý maqsatynda uıymdastyrylǵan aktsııaǵa shamamen 1000-ǵa jýyq adam tartyldy.