Tarazdyq voleıbolshy jigitter Joǵarǵy lıganyń «B» tobyndaǵy el chempıonatynda qarsylas shaq keltirmedi
ALMATY. 27 jeltoqsan. QazAqparat - Tarazda 20-26 jeltoqsan kúnderi Joǵarǵy lıganyń «B» tobyndaǵy erler komandalary arasynda el chempıonatynyń 2-shi týry ótti.
Onda 7 oıynda múmkin bolǵan eń joǵarǵy 21 upaıdyń 20-syn óz qorjynyna salǵan alań qojaıyndary barlyq qarsylastarynan basym tústi. «TNK Qazhrom» (Hromtaý) - 18, «Munaıshy» (Aqtaý) - 15, «Atyraý-2» - 13, «Qorqyt Ata-QMÝ» (Qyzylorda) - 9, «Astana-Ulan» - 6, «Qostanaı» - 3 upaı qossa, «Shyǵys-QorǵasynQurylys-3» birde-bir upaı ala almady. Sonyń nátıjesinde týrnır kestesinde eki týrdyń qorytyndysy boıynsha 14 oıynda 38 upaı jınaǵan tarazdyqtar kósh bastaýda. Olar alǵashqy týrda ǵana bir ret jeńilistiń aşy dámin tatty. Ekinshi orynda úsh kezdesýde jeńilip, kósh basyndaǵylardan 3 upaı qalyp qoıǵan atyraýlyqtar kele jatyr. Al tórt ret jeńilis taýyp, birdeı 30 upaıdan jınaǵan Hromtaý men Aqtaý komandalary sáıkesinshe, 3, 4-shi oryndardy ıelenýde. Qyzylordalyqtar 13 upaımen (10 jeńilis) besinshi, astanalyqtar 11 upaımen (10 jeńilis) altynshy, qostanaılyqtar 9 upaımen (11 jeńilis) jetinshi, óskemendikter 3 upaımen segizinshi oryndy (13 jeńilis) qanaǵat tutýda. Endi 3-shi týr oıyndary 19-27 aqpanda Aqtaýda ótedi.
