Tarazdyq ustazdar Germanııada ótken halyqaralyq konferentsııaǵa qatysty
TARAZ. QazAqparat –Tarazdaǵy Nazarbaev Zııatkerlik mektepteriniń muǵalimderi Inna Aksenova men Inna Bogýcharskaıa Germanııanyń Gambýrg qalasynda ótken ECER 2019 bilim salasyndaǵy eń iri eýropalyq konferentsııasyna qatysty,-dep habarlaıdy QazAqparat.
Tarazdyq muǵalimder halyqaralyq ǵylymı jurtshylyq nazaryna «Táýekelder áleminde PBL problemalyq-baǵyttalǵan oqytý qoldaný boıynsha muǵalimderdiń kásibı damýyna uıymdastyrýshylyq ınnovatsııalardy engizý» taqyrybyndaǵy zertteý nátıjelerin usyndy.
Pedagogtardyń aıtýynsha, ECER 2019 konferentsııasyna qatysý bilim berý salasyndaǵy zamanaýı zertteý úrdisterin anyqtaýǵa múmkindik berdi. Sondaı-aq, olar sheteldik áriptesteriniń konferentsııada usynylǵan zertteý nátıjeleri qoljetimdi, ári joǵary kásibı deńgeıde usynylǵanyn atap ótti.
Konferentsııa qorytyndysy boıynsha I. Aksenova men I. Bogýcharskaıa Frıdrıh-Aleksandr atyndaǵy ýnıversıtettiń pedagogıka ınstıtýty professory Maıkl Golıchtiń basshylyǵymen uıymdastyrýshylyq oqytý salasyndaǵy jetekshi zertteýshilerdiń kásibı qaýymdastyǵyna múshe boldy. Qaýymdastyqqa múshe bola otyryp, muǵalimder halyqaralyq áriptestermen yntymaqtastyqta jahandyq jáne áleýmettik qaýip-qaterler áleminde kásibı damytý boıynsha jergilikti muǵalimderge qoldaý kórsetýdi jalǵastyrady.
Bıylǵy jyly ECER álemniń túkpir-túkpirinen 3000-ǵa jýyq jetekshi ǵalymdar men bilim berý salasynyń mamandaryn jınady. Bilim berýdegi zertteýler boıynsha Eýropalyq qaýymdastyq ıaǵnı EERA uıymdastyrǵan bıylǵy forým bolashaq úshin bilim berý zertteýleriniń róline arnaldy.
