Tarazdyq Uly Otan soǵysy ardagerlerine páter kiltteri tapsyryldy

JAMBYL OBLYSY. Mamyrdyń 7-i. QazAqparat /Galına Skrıpnık/ - Búgin, mamyrdyń 7-i kúni Jeńistiń 65 jyldyǵy qarsańynda Taraz qalasynda Uly Otan soǵysy ardagerlerine páter kiltterin tabys etý saltanaty boldy.

Taraz qalasynda baspana alýǵa kezekte turǵan 27 ardager men múgedekter oblys ortalyǵynyń ońtústik-batys shetinde ornalasqan «Báıterek» shaǵyn aýdanyndaǵy páterlerdiń baqytty ıelerine aınaldy.

Jambyl oblysynyń ákimi Qanat Bozymbaev óz qolymen páter kiltterin tabys ete otyryp, qonys ıeleriniń densaýlyǵy men kóńil-kúıin surap jatty. Óz sózinde ol jasaǵan erlikteri eshqashan umytylmaıtyn soǵys ardagerlerine jergilikti bılik múmkinshilikke qaraı árdaıym qoldaý kórsetip, aýyldyq ardagerlerdi de úımen qamtamasyz etýdiń joldaryn qarastyratyndyqtaryn aıtty.

Óz kezeginde soǵysqa qatysýshy Imanqul Jaqsyǵulov pen Evdokııa Sannıkova Memleket basshysy men jergilikti bılikke kórsetken qoldaýlary úshin alǵystaryn bildirdi.

«Ókinishke oraı, soǵys ardagerleriniń qatary azaıyp barady, - dedi Q.Bozymbaev. - Búgingi tańda bizdiń oblys boıynsha segiz júz Uly Otan soǵysynyń qatysýshylary bar. Al bes jyl buryn Jeńistiń 60 jyldyǵy atalyp ótilgende olardyń sany bes myńǵa taıaý edi».

Osy mereke aldyndaǵy kúnderde oblystyń iri kásiporyndary men uıymdary ardagerler úshin mádenı sharalary men merekelik qonaǵasy uıymdastyryp jatyr, olarǵa biraz ýaqyt buryn qalalyq kólikterde tegin júrý múmkindigi, sondaı-aq monsha men shashtaraz qyzmetterin tegin kórsetý usynylǵan. Qalalyq bıýdjet esebinen telefon abonentteri men sýyq sý tólemine jeńildikter qarastyrylǵan.

Tarazdaǵy Jeńis mereıtoıynyń qorytyndysy Ońtústik áskerı okrýgynyń kúshimen «Dostyq» ortalyq alańynda ótetin áskerı sherý bolmaq.