Tarazdyq Talǵat qolarbada otyryp bılep, bir jarystan úsh medal jeńip alǵan
TARAZ. QazAqparat - Taraz qalasynyń turǵyny Talǵat Amanbekov jýyrda Almaty qalasynda múmkindigi shekteýli azamattar arasynda ótken el chempıonatynda eki altyn, bir qola júldeni jeńip alǵan, dep habarlaıdy QazAqparat.
Ol atalmysh básekede qolarbada sporttyq bı bıleýden chempıon atanyp, juptasyp bıleý boıynsha da altynnan alqa taǵynǵan. Onyń juby halyqaralyq jarystardyń jeńimpazy Nargıza Ahmetova boldy. Osy jarysta Talǵat erler arasynda da jalǵyz bıleýden qola júldege qol jetkizdi. Osylaısha bir jarystan úsh júldeni ıelengen.
Talǵat - oblystyq №1 arnaýly áleýmettik qyzmetter usyný ortalyǵynyń turǵyny. Ortalyqtaǵy kórkemónerpazdar úıirmesiniń belsendi múshesi. Ol kishkentaı kezinen qolarbada jaqsy bıleıdi. Juptasyp arbamen bıleýdi Tolǵanaı Tórebek ekeýi birge bastaǵan. Olar ekeýi juptasyp bıleýden 2012 jyly Qazaqstan chempıony ataǵyna qol jetkizse, 2013 jyly QR kýbogynyń ıegeri atanǵan. 2014 jyly Ońtústik Koreıanyń Inchhon qalasynda ótken jazǵy Parazıalyq oıyndaryna qatysqan. «Nur Otan» partııasynyń «Kedergisiz keleshek» jobasy aıasynda «Janshýaq» qoǵamdyq syılyǵynyń ıegeri.
«Múmkindigi shekteýli azamattarmen jumys isteý ońaı emes. Árqaısysynyń minezi, kózqarasy ártúrli. Taǵdyrdyń jazǵanyna moıymaı, úmitpen alǵa umtylatyndary da az emes. Sondaı qaısar azamattyń biri - Talǵat Amanbekov. Ol óziniń qıyn taǵdyryna qaramastan ómirge degen sheksiz mahabbatyn dáleldep, on eki múshesi saý azamattardyń jete almaı júrgen asýlarynan asyp kele jatyr. Biz Talǵatpen maqtanamyz»,- deıdi atalmysh ortalyq dırektory Raıhan Seıdalıeva.
Talǵat jeńimpaz bop oralǵanda ortalyqtyń basshysy bastaǵan top qalanyń kireberisinen qarsy alyp, qýanyshqa ortaqtasypty.
Aıta keteıik, Talǵat Amanbekov 2016 jyly oblys ákimdigi dene shynyqtyrý jáne sport basqarmasyna qarasty dene múmkindigi shekteýli adamdarǵa arnalǵan klýbqa múshe bolyp qabyldanǵan. Qazir «Taraz - Arena» sport keshenine baryp, úzdiksiz jattyǵyp júr. Ol osyǵan deıin elimizdiń bas qalasynda jyl saıyn ótetin «Astana OPEN» halyqaralyq týrnırinde birneshe ret jeńimpaz atanyp úlgergen. 2017 jyly Atyraý qalasynda sporttyq bıden ótken ІH halyqaralyq týrnırde top jarǵan.
Ǵıbrat Sembaı
