Tarazdyq stýdentter qant dıabetine qarsy dárilik ósimdikter ósirýde
ASTANA. QazAqparat - Tarazdyq stýdentter jylyjaı kesheninde qant dıabetine qarsy dári-dármek alynatyn stevııa ósimdigin ósirýde. Jas ǵalymdar ony bolashaqta óndiriske engizýdi de kózdep otyr.
Sońǵy jyldary birqatar memleketterde quramy dárýmenderge baı stevııany aýyl sharýashylyǵy daqyly retinde kóp mólsherde ósirý qolǵa alynýda. Buǵan sebep te joq emes. Tabıǵı qant almastyrǵyshtyń qaınar kózi bolyp tabylatyn onyń keptirilgen japyraǵynyń qara bazardaǵy bir kelisiniń quny 340 AQSh dollaryna saýdalanýda. Al, suıyq kontsentrat kúıindegi baǵasy 306 dollar tursa, bir keli tabletka túrindegisi 5 myń AQSh dollaryna jýyq somaǵa satylýda.
Jambyl oblysynyń stýdentteri quny qymbat stevııany Qazaqstanda ósirip, odan ónim alýdy ońtaıly jolǵa qoıýǵa nıetti. Osyǵan oraı, jas ǵalymdar Taraz qalasyndaǵy fızıka-matematıka baǵytyndaǵy Nazarbaev zııatkerlik mektebiniń muǵalimderimen birlesip arnaıy ǵylymı-zertteý jumystaryn júrgizýde.
- Maqsatymyz - elimizdiń óndiris salasyna tabıǵı qant almastyrǵysh kózi retinde paıdalanylatyn stevııa ósimdigin endirý úshin bıotehnologııalyq kóbeıtý ádisterin jetildirý. Bul óz kezeginde odan alynatyn dári-dármek ónimderiniń qarapaıym azamattar úshin qoljetimdi bolýyna sep bolmaq, - deıdi joba avtorlary.
Stevııa jylý súıgish bolǵandyqtan ol Qazaqstannyń klımatyna tózimsiz ári ónýge beıimsiz keledi. Osyǵan baılanysty stýdentter ony zamanaýı quraldarmen jabdyqtalǵan jylyjaıda kóbeıtýdi maqsat etip otyr.
