Tarazdyq stýdent kıkboksıngten álem Kýbogyn ıelendi
ASTANA. QazAqparat - Reseıdiń Anapa qalasynda kıkboksıngten eresekter arasyndaǵy VII álem Kýbogynda Taraz memlekettik pedagogıkalyq ınstıtýtynyń 2-kýrs stýdenti Araılym Áýezova jeńimpaz atandy, dep habarlaıdy TarMPI Aqparattyq-ımıdjdik qyzmeti.
Anapadaǵy «Vıtıazevo» sport kesheninde ótken baıraqty básekege 28 elden kelgen 200-den astam sportshy qatysty. Araılym Áýezova 48 keli salmaq dárejesinde úsh beldesý ótkizip, jarys jolynda Úndistan, Belarýs jáne Reseı elderinen kelgen qarsylastarynan basym tústi.
«Álem Kýbogyna qatysýshylar kıkboksıngtiń barlyq túrleri boıynsha baqtary men baptaryn synady. Ásirese, «point fighting» jáne «K-1» nusqalary asa tartysty ótti. Araılym tóbelesý taktıkasy men tehnıkasynyń ádemiligi jaǵynan ózgelerden oq boıy ozyp shyqty», - deıdi bapkeri, Jambyl oblysynyń kıkboksıngten aǵa jattyqtyrýshysy Sábıt Ýsıpov.
Jas sportshy buǵan deıin kıkboksıngten eresekter arasyndaǵy Qazaqstan Respýblıkasy chempıonatynyń altyn medal ıegeri atanyp, atalǵan sport túrinen QR Kýbogy úshin jarysta 2-shi oryndy qanjyǵasyna baılaǵan.
Búginde ol bıylǵy jyldyń 14-16 qazan kúnderi Almatyda ótetin respýblıkalyq «Úzdikter týrnırine» daıyndalýda.
