Tarazdyq sportshy qol kúresten 7 jyl boıy jeńilip kórmegen amerıkalyqty tize búktirdi
ASTANA. QazAqparat - Jambyldyq sportshy armrestlıngten «Qurlyqaralyq chempıondyq belbeýin» jeńip aldy. Ol 7 jyl boıy eshkimge jeńilip kórmegen amerıkalyq sportshyny tize búktirip, chempıondyq ataqqa ıe boldy.
AQSh-tyń Las-Vegas qalasynda ótken jarysta absolıýttik salmaqta óner kórsetken tarazdyq Dmıtrıı Trýbın qarsylasy Maıkl Toddtan 4:2 esebimen basym tústi. Al 2-6 naýryz aralyǵynda osy elde qol kúresten ótken «Arnold klassık» halyqaralyq týrnırinde ol bul jetistigin taǵy bir márte qaıtalap, qarsylastaryn moıyndatty, dep habarlaıdy 24.kz.
Aıta ketý kerek, atalǵan jarysta álemniń 40 elinen 500-ge tarta sportshy baq synaǵan.
"Týrnır óte qıyn boldy. Ásirese aqtyq syndaǵy qarsylasym myqty, tájirıbeli sportshy edi. Onyń qol kúrestirý ádisi yńǵaısyz ári bizdiń erejelerge sáıkes kelmeıdi. Biraq bul jarysta ondaı qýlyqtar ruqsat etile beredi eken. Degenmen, onyń osal tusyn taptym. Elimizdiń kók baıraǵy Amerıka tórinde kóterildi. Men úshin bul úlken jetistik. Endi bul aýyspaly belbeýdi elde ustap qalý úshin barymdy salamyn", - deıdi qol kúresten qurlyqaralyq chempıondyq belbeý ıegeri Dmıtrıı Trýbın.
