Tarazdyq polıtseıler mas júrgizýshini tapanshanyń kómegimen toqtatty
TARAZ. QazAqparat – Jambyldyq polıtseıler tabeldik qarýdy qoldanyp, jasyrynýǵa áreket jasaǵan júrgizýshini ustady, dep habarlaıdy QazAqparat tilshisi.
Jol erejesin buzǵan kúdiktini Taraz qalasynyń polıtsııa basqarmasynyń jergilikti polıtsııa qyzmeti bólimi patrýldik polıtsııa batalonynyń qyzmetkerleri ustady. Bul týraly oblystyq polıtsııa departamentiniń baspasóz qyzmeti málimdedi.
«Mırzoıan kóshesindegi №5 úıdiń janynda manevrleý erejesin buzǵany úshin oblys ortalyǵynyń 38 jastaǵy turǵyn tizgindegen «Toıota Kamrı-40» avtokóligi toqtatyldy. Alaıda, júrgizýshi polıtsııa qyzmetkerleriniń zańdy talaptaryna baǵynbaı, daýys zoraıtqyshpen tabeldik qarýdy qoldaný múmkindigi týraly eskertýdi elemeı, «Jiger» turǵyn úı massıvine qaraı qashýǵa áreket jasaǵan. Qoshanov kóshesindegi úılerdiń birine toqtaǵan soń, júrgizýshi avtokólikten shyǵýdan bas tartyp, taǵy da qashyp ketýge talpynǵan. Saldarynan polıtsııa qyzmetkerleri kólik quralyn toqtatý maqsatynda tabeldik qarýdy qoldanýǵa májbúr boldy. Alǵashqy eskertý oǵy aýaǵa, qalǵandary kólik dóńgelekterine atyldy»,-delingen vedomsvo habarlamasynda.
Odan soń kóp uzamaı júrgizýshi turǵylyqty jeri boıynsha qolǵa túsken. Kýálandyrý aktisine sáıkes, ol jeńil dárejede alkogoldik mas kúıinde bolǵan.
Júrgizýshige qatysty QR ÁQBtK 595-babynyń 1-bóligi, 608-babynyń 1-bóligi jáne 613-babynyń 1-bóligi boıynsha hattamalar toltyryldy.
Qazirgi tańda kólik quraly arnaıy turaqqa qoıylyp, faktige qatysty tıisti saraptamalar taǵaıyndalǵan.
