Tarazdyq polıtseı: Áriptesim kóz aldymda oqqa ushyp kóz jumdy

NUR-SULTAN. QazAqparat – Bıyl qańtardyń basynda elimizdiń birneshe óńirinde jappaı tártipsizdik boldy. Ókinishke qaraı, sol oqıǵalar kezinde polıtsııa men búlikshiler arasyndaǵy qaqtyǵystan 225 adam kóz jumdy. Osy oraıda Jambyl oblysynyń ýcheskelik ınspektory, polıtsııa kapıtany Nursultan Qozıev basynan keshken jaıtty QazAqparat tilshisine aıtyp berdi.

«2022 jyldyń 4 qańtary, kezekti jumys kúni. Bizge beıbit mıtıng bolatyny jáne qoǵamdyq qaýipsizdikti qamtamasyz etý tapsyryldy. Sherý oblystyq ákimdik alańynda bastaldy. Degenmen, qarsylyq tań atqansha jalǵasty. Árıne, biz beıbit sherýge shyqqandarǵa kúsh qoldanǵan joqpyz. Kerisinshe, qarsylyq tanytýshylardy sabyrǵa shaqyrdyq. Bizdiń tarapymyzdan eshqandaı kúsh kórsetý bolǵan joq. Soǵan qaramastan qarsylyq toqtaǵan emes. Mende jáne áriptesterimde qarý bolmady. Sebebi bizge oq atýǵa ruqsat berilmedi. Degenmen biz alańǵa jetem degenshe atys bastalyp ketti», - deıdi Nursultan Qozıev.

Tártip saqshysynyń aıtýynsha, ol aınalasynda ne bolyp jatqanyn túsinbegen. Sebebi shabýyl kútpegen jerden boldy.

«Ortalyq alańda bizge kútpegen jerden shabýyl jasaldy. Qarsylyq tanytýshylar bizge baǵyttap oq ata bastady. Sol sátte meniń arqama oq tıdi. Menimen qatar áriptesim Rahatqa da oq tıdi. Ókinishke qaraı, ol tilge kelmeı jan tapsyrdy», - deıdi ol.

Degenmen ýádesine adal áskerı qyzmetker buıryq boıynsha sońyna deıin jumys istegen.

«Biz mindetimizge saı sońyna deıin kúrestik. Ol - bizdiń mindet. Biz antqa adal bolýymyz kerek. Ókinishtisi, sol kúres barysynda isine adal áriptesimizden aıryldyq», - deıdi tártip saqshysy.