Tarazdyq oqýshy jerdi asteroıdtan qorǵaıtyn keshenniń shaǵyn modelin jasap shyǵardy
Al aspan áleminiń qupııalaryn ashýǵa qulshynǵan órenderdiń Qyzylordada bas qosýy tegin emes. Óıtkeni adamzat ǵaryshqa qadam basqan áıgili «Baıqońyr» osy óńirde. Naýryz kezdesýlerine elimizdiń barlyq óńirlerinen 200-den astam oqýshy qatysýda. Olar 80-ge jýyq ǵaryshtyq joba usynyp otyr. Tipti jerdi túrli ǵaryshtyq qaýip-qaterlerden qorǵaıtyn ámbebap keshenniń úlgisin de daryndy oqýshylar jasap shyqty. Solardyń biri - Taraz qalasynan kelgen Serik Maqsat. Ol jedel áreket etýge arnalǵan orbıtalyq keshenniń shaǵyn modelin oılap tapty.
«Orbıtasynda júrip, jerge asteroıd nemese kometa kele jatqanyn baıqasa, bólinip, elektromagnıttik tartylys sııaqty quraldardy qoldaný arqyly jerdi asteroıdtardan qorǵaı alady», - deıdi Tarazdaǵy Nazarbaev zııatkerlik mektebiniń oqýshysy Serik Maqsat.
Oqýshylar ǵarysh apparattarynyń 3D modelderin, orbıtalyq stantsııalar, ámbebap borttyq qurylǵylar, kópfýnktsıonaldy zymyrandar sekildi birqatar tyń tehnologııa negizindegi úlgilerin pash etti. Al ozyq oıly oǵlandardyń jumysyna elimizdiń ǵaryshkerleri, halyq qaharmandary - Toqtar Áýbákirov, Talǵat Musabaev, Aıdyn Aıymbetov, NASA okilderi, Eýropalyq ǵaryshkerlerdi daıyndaý ortalyǵynyń ǵylymı qyzmetkerleri, Ulybrıtanııa, AQSh, Germanııa jáne Qazaqstannyń túpkir-túpkirindegi joǵary oqý oryndarynyń avstronavtıka salasy mamandary baǵa berip, dáris oqydy.
«Árbir eksponat pen maketter erekshe den qoıaǵa turarlyq eken. Mektep oqýshylary osyndaı ǵajaıyptar týdyrady degenge sený qıyn. Biraq olar naǵyz daryn ıesi ekendikterin dáleldeı aldy. Іzdenimpaz jastar úshin Nazarbaev zııatkerlik mektepteriniń bazasynda barlyq jaǵdaı bar. Bul - jastardyń ǵarysh keńistigin jáne búkil álemdi ıgerý úshin mol múmkindik beredi», - dep atap ótti Qazaqstannyń halyq qaharmany, QR Parlamenti Senatynyń depýtaty Talǵat Musabaev.
«Meni oqýshylardyń jumystary tań qaldyrdy. Qyzyqty ári paıdaly jobalar óte kóp. Bul oqýshylar bolashaqta eleýli zertteýlermen aınalysatynyna senimdimin», - deıdi Ulybrıtanııadan kelgen Nasa ǵylymı qyzmetkeri Pravın Pratapan.
Shara aıasynda oqýshylar ǵarysh kemesiniń shaǵyn modelin jasap, ony ushyryp ta kórsetti. Zymyrandardy kókke kóterý úshin mehanıkalyq jáne hımııalyq otyn túrlerin paıdalandy.
Aıta keteıik, Naýryz kezdesýlerine qatysýshy oqýshylar birer kún buryn «Baıqońyr» ǵarysh aılaǵynda bolyp, zymyrannyń ushyrylý sátin tamashalaǵan bolatyn. Sharanyń sońǵy kúni, ıaǵnı erteń olar «Qorqyt ata» memorıaldyq kesheni men «Gagarın starty» aılaǵyn kóredi.
