Tarazdyq oqýshy órt sóndirýshi robot qurastyrdy

TARAZ. QazAqparat – Taraz qalasyndaǵy №7 mektep-gımnazııa oqýshysy órt kezinde adamdardy qutqarýǵa kómektesetin robot oılap tapty, dep habarlaıdy QazAqparat Oqý-aǵartý mınıstrligine silteme jasap.

Vıacheslav Kýzmın 9-synyp oqýshysy. Ol tehnıkalyq-shyǵarmashylyq ortalyqta qosymsha bilim alady. Tótenshe jaǵdaı kezinde kómek bolatyn qurylǵyny osy ortalyqta tálimgeri Aınur Suranshıevanyń jetekshiligimen jasap shyǵarǵan. Robotqa «Temir-Batyr» dep at qoıǵan. Qultemir órt kezinde jalyndy sóndirip, qoıý tútin ishinde qalǵan adamdy da izdep taba alady.

«Robottyń aldynda kedergilerdi ıterýge arnalǵan qurylǵysy jáne kamerasy bar. Temir-Batyrdy qashyqtyqtan basqaryp, kamera arqyly órt bolǵan jerdi kórýge, ýltradybysty qondyrǵynyń kómegimen órttiń qaı jerden shyqqanyn, adamnyń bar-joǵyn anyqtaýǵa bolady. Robottyń ishine eki bak ornatylǵan. Oǵan jaǵdaıǵa baılanysty kópirshik nemese sý toltyrylady. Suıyqtyq qysymmen 5 metr qashyqtyqqa shashylady», - deıdi ónertapqysh.

Vıacheslav Kýzmın Temir-Batyrdy Jambyl oblysynyń tótenshe jaǵdaılar departamenti mamandaryna aparyp kórsetpek. Patent alyp, robotty taǵy da jetildirý josparynda bar.